کراچی / سکھر : صوبہ سندھ میں ہونے والے ضمنی بلدیاتی انتخابات کے دوران کراچی اور مختلف شہروں میں بدنظمی اور ہنگامہ آرائی کے واقعات پیش آئے ہیں۔
اس حوالے سے ملنے والی اطلاعات کے مطابق کراچی کے ضلع غربی یوسی 2میں پولنگ اسٹیشن نمبر29 کے باہر بدنظمی سے صورتحال کشیدہ ہوگئی۔
اورنگی سیکٹر ساڑھے 11میں پیپلزپارٹی اورٹی ایل پی کارکنان آمنے سامنے آگئے، پولیس کی نفری پولنگ اسٹیشن کے باہر پہنچ گئی۔
یو سی13نیوکراچی میں پی پی اور جماعت اسلامی کارکنوں میں جھگڑے کے باعث دو کارکنان زخمی ہوگئے، جھگڑے کے بعد پولیس کی بھاری نفری طلب پولنگ روک دی گئی جو کچھ دیر کے بعد بحال کردی گئی۔ پولیس نے سیاسی جماعت کے ایک کارکن کو اسلحہ سمیت گرفتار کرکے تھانے منتقل کردیا۔
کراچی میں بلدیاتی انتخابات کے دوران اسلحہ کی نمائش پر پابندی عائد ہونے کے باوجود کورنگی میں ایک سیاسی جماعت کا کارکن گن مین کے ساتھ علاقے میں دیدہ دلیری سے گھومتا رہا، پولیس نے اسلحہ بردار افراد کے خلاف کوئی کارروائی نہیں کی۔
اس کے علاوہ سکھر میں پولنگ اسٹیشن بچل دھاریجو پر پیپلز پارٹی اور جے یو آئی کارکنان میں تلخ کلامی ہوگئی، پولنگ اسٹیشن کے سامنے کارکنان نے ایک دوسرے کے خلاف نعرے بازی کی جس کے بعد بات تلخ ککلامی تک جاپہنچی۔
بعد ازاں صورتحال کو نوٹس لیتے ہوئے دونوں جماعتوں کے رہنماؤں اور پولیس نے کارکنان کےدرمیان بیچ بچاؤ کرایا، ڈسٹرکٹ ریٹرننگ آفیسر پولنگ اسٹیشن پہنچ گئے۔
