دنیا حیران کن واقعات و اتفاقات کا مجموعہ ہے۔ اب اس سیاحتی گائیڈ کو ہی دیکھ لیجیئے جو ایک لاوا ابلتے ہوئے پہاڑ پر گیا تو کسی اور مقصد سے تھا، لیکن وہاں اس کا کیمرہ اس کے ہاتھ سے چھوٹ کر گر پڑا جس نے پگھلتے ہوئے لاوے کی حیران کن ویڈیو ریکارڈ کرلی۔
امریکی ریاست ہوائی میں ایرک اسٹورم نامی یہ سیاحتی گائیڈ سیاحوں کے ایک گروپ کے ساتھ ایک آتش فشاں پہاڑ کے اوپر گیا۔ اسی دوران وہاں سے کم مقدار میں لاوا ابلنا شروع ہوگیا اور سیاح اس پگھلتے لاوے کو بہتا دیکھ کر رک گئے۔
ایرک بھی اس کی ویڈیو بنانے لگا کہ اچانک کیمرا اس کے ہاتھ سے چھوٹ کر گر پڑا اور لڑھکتا ہوا لاوے کے ساتھ ایک تنگ جگہ پر پھنس گیا جس کے بعد لاوا کیمرے کے اوپر آگرا اور کیمرا بھی جلنا اور پگھلنا شروع ہوگیا۔
خوش قسمتی سے لاوا شدید نوعیت کا نہیں تھا لہٰذا اس کا اخراج جلد ہی رک گیا اور بہتا ہوا لاوا چند منٹ بعد سخت پتھر کی شکل اختیار کرگیا۔
ایرک کا کیمرہ بھی لاوے کی زد میں آکر سخت پتھر میں قید ہوچکا تھا جسے کسی طرح ایرک نکال کر گھر لے آیا۔
ایرک کا خیال تھا کہ اس پتھر کے نیچے سے اس کا جلا ہوا کیمرہ برآمد ہوگا اور وہ اپنے کیمرے سے محروم ہوجائے گا۔ اس نے ایک ارضیاتی پتھر کے مخصوص ہتھوڑے سے پتھر کو توڑ کر کیمرے کو باہر نکالا تو کیمرے کا لینس جل چکا تھا۔
تاہم یہ دیکھ کر ایرک کی حیرت کی انتہا نہ رہی کہ اس میں موجود فلم اور ریکارڈنگ بالکل محفوظ رہی تھی۔ ایرک نے اس ویڈیو کو چلایا تو پگھلتے لاوے کی یہ حیران کن ویڈیو سامنے آئی۔
ایرک نے اسے سوشل میڈیا پر شیئر کیا جہاں لوگوں نے اس ویڈیو کو دیکھ کر بے حد خوشی و حیرت کا اظہار کیا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
