راولپنڈی: خیبرپختونخوا کے ضلع جنوبی وزیرستان میں سیکیورٹی فورسز کے قافلے پر دہشت گردوں کی فائرنگ سے کیپٹن عبداللہ ظفر شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز کی جنوبی وزیرستان کے علاقے شکئی میں نائٹ پیٹرولنگ جاری تھی اس دوران قافلے پر دہشت گردوں نے فائرنگ کی، فائرنگ کے تبادلے میں کیپٹن عبداللہ ظفر شہید ہوگئے۔
آئی ایس پی آر کے مطابق کوہاٹ کے 25 سالہ کیپٹن عبداللہ نے بہادری سے دہشت گردوں کا مقابلہ کیا۔
آئی ایس پی آر کا کہنا ہے کہ سیکیورٹی فورسز نے علاقے کو گھیرے میں لے کر کلیئرنس آپریشن شروع کردیا۔
مزید پڑھیں: میرانشاہ میں آپریشن کے دوران 2 فوجی جوان شہید
واضح رہے کہ چند روز قبل بھی شمالی وزیرستان کے علاقے میرانشاہ میں سیکیورٹی فورسز کے آپریشن کے دوران دہشت گردوں سے فائرنگ کے تبادلے میں 2 فوجی جوان شہید ہوگئے تھے۔
آئی ایس پی آر کا کہنا تھا کہ شہید اہلکاروں میں حوالدار تاجبر علی اور سپاہی راشد شامل ہیں،حوالدار تاجبر علی کا تعلق سوات سے جبکہ راشد کا تعلق پارا چنار سے ہے۔
یاد رہے کہ اگست میں جنوبی وزیرستان میں سرچ آپریشن کے دوران دہشت گردوں کی فائرنگ سے 3 جوان شہید ہوگئے تھے، شہید ہونے والوں میں سپاہی سلیم، صوبیدار ندیم اور لانس نائیک مصور شامل تھے۔
