اسلام آباد : وفاقی وزیرتجارت سید نوید قمر نے کار ڈیلرز کو خبردار کیا ہے کہ گاڑیوں کی قیمتیں کم نہ کی گئیں تو سخت کارروائی کی جائے گی۔
تفصیلات کے مطابق وفاقی وزیرتجارت سید نوید قمر کی جانب سے بیان میں کہا گیا ہے کہ کار ڈیلرز ریگولیٹری ڈیوٹی کے خاتمے کےبعد درآمدی گاڑیوں کی قیمتیں کم کریں، گاڑیوں کی قیمتیں کم نہ کی گئیں تو سخت کارروائی کی جائے گی۔
سید نوید قمر کا کہنا تھا کہ لگژری اشیا پر اضافی ریگولیٹری ڈیوٹی 31 مارچ کو ختم ہوئی، آئی ایم ایف کیساتھ معاہدے کو حتمی شکل دی جائےگی۔
وفاقی وزیر نے کہا کہ آئی ایم ایف سے معاہدے کےبعدلیٹرآف کریڈٹ کھولنےپرپابندیاں ہٹا دی جائیں گی، ایل سیز کے دوبارہ کھلنے سے برآمدی صنعتوں کیلئے خام مال آسانی سے دستیاب ہوگا۔
یاد رہے چیئرمین ایف بی آر عاصم احمد نے اسلام آباد میں بریفنگ دیتے ہوئے بتایا تھا کہ موبائل فون اور کاروں پر ریگولیٹری ڈیوٹی 31 مارچ تک عائد کی گئی تھی اور مقررہ تاریخ گزرنے کے بعد دونوں اشیا پر سے ریگولیٹری ڈیوٹی ازخود ختم ہوگئی ہے تاہم وزارت تجارت کسی بھی وقت موبائل فون اور کاروں پر ریگولیٹری ڈیوٹی عائد کرے گا۔
چیئرمین ایف بی آر کا کہنا تھا کہ اس وقت کوئی پُرتعیش اشیا امپورٹ نہیں ہوسکتیں، کاریں اور موبائل فونز بھی درآمد نہیں ہو رہے ہیں جب کہ گاڑیوں کی امپورٹ اور ریگولیٹری ڈیوٹی میں کمی کا فیصلہ وزارت تجارت نے کرنا ہے۔
