کراچی : سمن آباد کےعلاقے سے 2 کم عمر طالبعلموں کے اغوا میں اغوا میں استعمال گاڑی رینٹ اے کار کی نکلی اور بچوں کے فرسٹ کزن وجاہت نے اغوا کی منصوبہ بندی کی۔
کراچی میں سمن آباد کےعلاقے سے 2 کم عمر طالبعلموں کے اغوا کے واقعے کی تحقیقات جاری ہے، ایس ایس پی اے وی سی سی ظفر صدیق نے بتایا کہ اغوا میں استعمال گاڑی رینٹ اے کار کی نکلی، اسپیشل ٹیم نے ناگن چورنگی کے قریب شو روم پر چھاپہ مارکرگاڑی برآمد کرلی ہے۔
ظفر صدیق کا کہنا تھا کہ اغوا کیلئے صائم عرف بلوچ نے گاڑی کرائے پر لی تھی، اغواسے ایک روز قبل 25مارچ کو گاڑی کرائے پر لی گئی تھی۔
ایس ایس پی ظفرصدیق نے بتایا کہ بچوں کے فرسٹ کزن وجاہت نے اغواکی منصوبہ بندی کی تھی، اغواء میں ملوث 5ملزمان پہلے ہی گرفتار ہیں اور پانچوں ملزمان کا پانچ روزہ ریمانڈ حاصل کرچکے ہیں جبکہ مزید2ملزمان کی گرفتاری کیلئے چھاپے مارے جارہے ہیں۔
یاد رہے چند دن قبل شہر قائد کے علاقے ناگن چورنگی پر اغوا کاروں کو اسکول جاتے اٹھائے جانے والے دو بچوں کو چھوڑ کر جانا پڑا تھا۔
پولیس نے سمن آباد کراچی سے اسکول آنے والے دو بھائیوں کو اسکول وین سے اتار کر اغوا کرنے والے 5 اغوا کاروں کو گرفتار کر لیا تھا۔
اغوا کاروں نے بچوں کو اغوا کرنے کے بعد اسکول وین کے ڈرائیور سے لیے گئے فون پر ڈیڑھ کروڑ روپے تاوان کا تقاضا بھی کیا تھا، بچوں کا کہنا تھا کہ انھیں حیدرآباد لے جایا گیا تھا، تاہم چند ہی گھنٹوں بعد بچوں کو ناگن چورنگی پر چھوڑ دیا گیا تھا۔
پولیس حکام کا کہنا تھا کہ اغوا کار گروہ کا ماسٹر مائنڈ مغوی بچوں کا قریبی رشتے دار وجاہت نکلا، جسے لگتا تھا کہ اس کے انکل کے پاس بہت پیسے ہیں۔
