کراچی: سندھ کی10رکنی نگراں کابینہ آج حلف اٹھائے گی، 10رکنی کابینہ کے تمام نام اے آروائی نیوز نے حاصل کرلیے ہیں۔
گورنرسندھ کامران ٹیسوری نگراں صوبائی کابینہ سے حلف لیں گے،جبکہ نگراں صوبائی کابینہ کی تقریب حلف برداری آج شام5بجے گورنرہاؤس میں ہوگی۔
اے آر وائی نیوز کو ذرائع سے ملنے والی اطلاعات کے مطابق حارث نواز کو نگراں وزیر بنایا جائیگا انہیں 2محکمے دیئے جائیں گے، مبین جمانی کو بھی نگراں وزیر بنایا جائے گا، انہیں بھی 2 محکمے دیئے جائیں گے۔
ڈاکٹرجنیدعلی شاہ، ڈاکٹر سعد نیاز کو نگراں وزیربنایا جائے گا، جبکہ ڈاکٹر رعنا حسین، خدا بخش مری کو نگراں وزیربنایا جائیگا۔
ذرائع کے مطابق یونس ڈھاگا اورایشور لعل آج نگراں وزیر کا حلف اٹھائیں گے، ارشد ولی محمد اور عمر سومرو کو نگراں وزیر بنایا جائے گا۔
دوسری جانب صوبہ خیبر پختونخوا کی نگراں کابینہ کے لیے 11 ناموں کی حتمی منظوری دے دی گئی ہے کابینہ میں کوئی مشیر یا معاون خصوصی نہیں ہوگا۔
اے آر وائی نیوز کو ذرائع سے ملنے والی اطلاعات کے مطابق صوبہ خیبر پختونخوا کی نگراں کابینہ کے لیے 11 ناموں کی حتمی منظوری دے دی گئی ہے۔ کابینہ میں صرف وزرا کو ہی شامل کیا جائے گا نگراں وزیراعلیٰ کوئی مشیر یا معاون خصوصی نہیں رکھیں گے۔
ذرائع کا کہنا ہے کہ نگراں کابینہ میں ڈاکٹر سرفرازعلی شاہ اور انجینئر انجم بہرہ ور خان شامل ہوں گے اس کے علاوہ سابق وزیر اعلیٰ پرویز خٹک کے پرنسپل سیکریٹری محمد اشفاق کو بھی نگران وزیر لگانے کا فیصلہ کیا گیا ہے۔
جسٹس (ریٹائرڈ) ارشاد قیصر اور ڈاکٹر ریاض انور نئی نگراں کابینہ کا بھی حصہ ہوں گے جب کہ عامر عبداللہ اور آصف رفیق آفریدی کو بھی شامل کیا جائے گا۔ صوبائی وزیر اطلاعات میاں فیروز جمال شاہ کاکا خیل اور مسعود شاہ کے ناموں کی بھی منظوری دی جا چکی ہے۔
ذرائع کا کہنا ہے کہ نگراں وزیر اعلیٰ نے گزشتہ روز کابینہ میں شمولیت سے قبل ملاقاتیں کیں۔ جن میں انجینئر عامر ندیم درانی، نجیب اللہ بھی شامل ہیں۔
