کراچی: نگراں وزیر اعلیٰ سندھ مقبول باقر کی کابینہ کے لیے مشاورت مکمل ہوگئی جس کے بعد کابینہ کے وزرا کے ناموں کو حتمی شکل دے دی گئی ہے۔
اے آر وائی نیوز کے مطابق نگراں سندھ کابینہ میں ڈاکٹر سعد نیاز، مس رعنا حسین اور ڈاکٹر جنید شاہ کی شمولیت کا امکان ہے، کابینہ ماہر تعلیم، ممتاز ڈاکٹر معروف سرجنز، ماہر معاشیات سیکیورٹی ماہرین پر مشتمل ہوگی۔
ذرائع کا کہنا ہے کہ نگراں سندھ کابینہ غیرجانبدار اور صوبے کے عوام کے وسیع مفاد میں کام کرے گی، کابینہ وزرا میں بے داغ ماضی، تعلیمی، پیشہ وارانہ قابلیت کا خصوصی خیال رکھا گیا ہے۔
نگراں سندھ کابینہ کل حلف اٹھائے گی، کابینہ میں بریگیڈیئر (ر) حارث نواز کو نگراں وزیر بنائے جانے کا امکان ہے، مبین جمانی اور یونس ڈھاگا کو بھی وزرات ملنے کا امکان ہے۔
نگراں وزیر اعلیٰ سندھ کی میڈیا سے گفتگو
دوسری جانب نگراں وزیر اعلیٰ سندھ مقبول باقر نے کہا کہ آئین اور قانون کی بالادستی ہوگی تو ہی آگے بڑھ سکتے ہیں، کوشش ہے کہ کابینہ میں کم سے کم لوگ ہوں، قانون اور آئین کی بالادستی ہوگی تو خود بہتری آئے گی۔
انہوں نے کہا کہ الیکشن کی تاریخ دینا الیکشن کمیشن کا کام ہے، میں ان کے نام میں مداخلت نہیں کرسکتا، ہمارا کام الیکشن کے لیے الیکشن کمیشن کی معاونت کرنا ہے۔
نگراں وزیر اعلیٰ سندھ نے کہا کہ کسی غیر آئینی کام کا حصہ نہیں بنوں گا، احتساب ہونا چاہیے لیکن نیک نیت سے ہونا چاہیے۔
