لاہور : چیئرمین پیپلز پارٹی بلاول بھٹو زرداری نے کہا ہے کہ انتخابات جب بھی ہوں کارکنان انتخابات کیلئے تیاری کرلیں۔
یہ ہدایات انہوں نے بلاول ہاؤس لاہور میں پیپلزپارٹی کے رہنماؤں سے ملاقات کے موقع پر کہی، ملاقات میں موجودہ سیاسی صورتحال اور سپریم کورٹ کے حالیہ فیصلے پر تفصیلی تبادلہ خیال کیا گیا۔
انہوں نے کہا کہ سپریم کورٹ کا فیصلہ جو بھی ہو ہمیں الیکشن کیلئے تیاری کرنی ہے، تفصیلی فیصلہ دیکھ کرہی اس پرکوئی تبصرہ کیا جاسکتا ہے۔ تفصیلی فیصلے میں دیکھنا ہوگا کہ فیصلے کی روح کیا ہے۔
چیئرمین پیپلزپارٹی کا کہنا تھا کہ انتخابات3ماہ کے اندر ہوں یا اس کے بعد پیپلزپارٹی اس کیلئے ہروقت تیار ہے، صوبائی تنظیمیں انتخابات کی تیاری شروع کریں، قومی اور صوبائی اسمبلی کے امیدواروں کا پیپر ورک ایک ہفتے میں مکمل کرلیا جائے۔
بلاول بھٹو نے رہنماؤں سے کہا کہ پنجاب کے آئندہ دورے پر تنظیمی حوالے سے پارٹی امور کا جائزہ لوں گا، جو امیدوار پہلے سے اچھی کارکردگی کا مظاہرہ کررہے ہیں ان کوٹکٹ دیں گے۔
انہوں نے کہا کہ سپریم کورٹ نے جو بھی فیصلہ کیا ہے پیپلزپارٹی کو اس سے کوئی فرق نہیں پڑتا، ہم جمہوری پارٹی ہیں، انتخابات کے لیےتیار ہیں، پارلیمانی بورڈ میں ٹکٹوں کا حتمی فیصلہ کریں گے۔
مزید پڑھیں : ہم اپنی الیکشن مہم کا آغاز کررہے ہیں، عمران خان
واضح رہے کہ چیئرمین پی ٹی آئی عمران خان نے بھی اپنے کارکنان کو انتخابات کیلئے تیار رہنے کی ہدایت دی ہے، نیوز کانفرنس سے خطاب میں ان کا کہنا تھا کہ ہم اپنی الیکشن مہم کا آغاز کررہے ہیں، ہفتے کو لائحہ عمل کا اعلان کروں گا۔
