اسلام آباد: چیئرمین پی ٹی اے عامر عظیم باجوہ نے کہا ہے کہ 2 ٹیلی کام آپریٹرز فائیو جی کا تجربہ کرچکے ہیں اب ٹیلی نار بھی تجربہ کرے گا۔
تفصیلات کے مطابق چیئرمین پی ٹی اے عامر عظیم باجوہ نے تقریب سے خطاب کرتے ہوئے کہا کہ ٹیلی کام کا شعبہ ترقی میں اہم کردار ادا کررہا ہے، صارفین کو اعلیٰ معیار کی جددید آئی سی ٹی خدمات پیش کررہے ہیں۔
چیئرمین پی ٹی اے نے کہا کہ ہمارا مقصد ملک میں جدید ترین ٹیکنالوجی متعارف کرانا ہے، ہمیں ٹیکنالوجی اور ٹیلی کام سروس میں مزید بہت کام کرنا ہے، حکومت کا ویژن بھی ملک میں ٹیکنالوجی کا فروغ ہے۔
عامر عظیم باجوہ نے کہا کہ ہمیں سوشل میڈیا پر غلط معلومات جیسے چیلنجز کا سامنا ہے، ہم ان مسائل پر غورو خوض سے قابو پاسکتے ہیں۔
مزید پڑھیں: پاکستان میں پہلی مرتبہ فائیوجی ٹیکنالوجی کا کامیاب تجربہ
چیئرمین پی ٹی اے نے کہا کہ متبادل توانائی، ٹیلی کام سیکٹر میں ہم ابھی بہت اچھے نہیں ہیں، حقیقی مسائل کی نشاندہی کے بعد درست سمت اختیار کرنا ہوگی۔
انہوں نے کہا کہ ہم فائیو جی ٹیکنالوجی کی جانب جارہے ہیں، ڈیٹا کے تحفظ کے لیے بھی کام جاری ہے۔
واضح رہے کہ فائیوجی سیلولر کمیونیکشن ٹیکنالوجی کے میدان میں جدید اور تیز ترین ٹیکنالوجی ہے، ٹیکنالوجی ماہرین کے مطابق فائیو جی ٹیکنالوجی سے اسمارٹ فونز پر انٹرنیٹ کی رفتار پچاس گنا بڑھ جائے گی ، جس کے ذریعے صارفین محض ایک سیکنڈ میں کئی میگا بائیٹ کی فلم ڈاؤن لوڈ کر سکیں گے۔
