پشاور : ماضی کی خاموش فلموں کے معروف اداکار چارلی چپلن کو پسند کرنے والے دنیا کے تقریباً ہر ملک میں ملیں گے، اُن کی اداکاری کا یہ خاصہ تھا کہ وہ بغیر کچھ کہے اپنے انداز سے ہی لوگوں کے چہروں پر مسکراہٹیں بکھیر دیا کرتے تھے۔
دنیا بھر کی طرح پاکستان میں بھی ان کے چاہنے والوں کی تعداد کم نہیں، ایک ایسے ہی نوجوان کو ہم آپ سے ملواتے ہیں جس نے کورونا وائرس کی عالمی وبا سے پھیلی خوفزدہ صورتحال میں لوگوں کو خوش کرنے کیلئے چارلی چپلن کا روپ دھار لیا، جسے دیکھ کر لوگ بے ساختہ ہنس پڑتے ہیں۔
پشاور کی سڑکوں پر سفر کرتے ہوئے آپ کی ملاقات اچانک چارلی چپلن سے ہوسکتی ہے، آپ یقیناً حیرت زدہ رہ جائیں کہ چارلی چپلن اور وہ بھی پشاور میں؟ لیکن پھر یہ نوجوان چارلی چپلن آپ کو اپنے مزاحیہ انداز میں مطلع کرے گا کہ وہ اصلی چارلی چپلن نہیں بلکہ پشاور کا عثمان خان ہے۔
پشاور کے علاقے گلبہار سے تعلق رکھنے والے پشاوری چارلی چپلن کا کہنا تھا کہ میں بچپن سے ہی مشہور چارلی چپلن کی ویڈیوز شوق سے دیکھتا تھا، حالیہ دنوں میں کورونا وائرس کا شکار ہونے کے بعد جب آئسلولیشن میں تھا تو تب خیال آیا کہ کیوں نہ میں بھی لوگوں میں خوشیاں بانٹنیں کا ذریعہ بنوں۔
اے آر وائی نیوز سے گفتگو کرتے ہوئے عثمان خان نے بتایا کہ پھر میں نے خود کو چارلی چپلن کے روپ میں ڈھال دیا، یقینی طور پر تو میں چارلی چپلن جیسا تو نہیں بن سکتا لیکن محدود وسائل میں اپنے فن کا مظاہرہ کرکے لوگوں کو تفریح مہیا کرنا چاہتا ہوں۔
