پشاور: صوبہ خیبر پختونخواہ میں جنگلی حیات کے تحفظ کے لیے چیک پوسٹیں قائم کرنے کی منظوری دے دی گئی، تمام چیک پوسٹوں کو محکمہ جنگلات کی اراضی پر قائم کیا جائے گا۔
تفصیلات کے مطابق وزیر اعلیٰ خیبر پختونخواہ محمود خان کی زیر صدارت صوبائی کابینہ کا اجلاس منعقد ہوا، اجلاس میں صوبے میں جنگلی حیات کو تحفظ دینے کے لیے چیک پوسٹیں قائم کرنے کا فیصلہ کیا گیا۔
اعلامیے میں کہا گیا کہ غیر قانونی شکار اور اسمگلنگ سے بچاؤ اور جنگلی حیات کے تحفظ کے لیے 22 چیک پوسٹیں قائم کی جائیں گی، چیک پوسٹیں ڈی آئی خان، ہری پور، چترال اور ایبٹ آباد میں قائم ہوں گی۔
اجلاس میں چیف کنزرویٹر جنگلی حیات کو چیک پوسٹ بنانے کا اختیار دے دیا گیا، 8 چیک پوسٹوں کو محکمہ جنگلی حیات اور محکمہ جنگلات مشترکہ طور پر استعمال کریں گے، تمام چیک پوسٹوں کو محکمہ جنگلات کی اراضی پر قائم کیا جائے گا۔
تمام چیک پوسٹوں کی کیمروں سے نگرانی کی جائے گی۔
ذرائع کا کہنا ہے کہ اجلاس میں وزیر اعلیٰ نے چیک پوسٹیں قائم کرنے کی منظوری دے دی ہے۔
