کراچی: وزیر اعلیٰ سندھ مراد علی شاہ نے بجلی اور گیس کمپنیوں سے اس ماہ عوام سے بل نہ لینے کی ہدایت کر دی ہے۔
تفصیلات کے مطابق سندھ کے وزیر اعلیٰ نے بجلی کمپنیوں سے 5 ہزار تک بل کے حامل صارفین سے اس ماہ بل نہ لینے کی ہدایت کر دی، سوئی سدرن گیس کو بھی 2 ہزار روپے کا بل نہ لینے کا کہہ دیا، انھوں نے کہا کہ بل اگلے 10 ماہ میں تھوڑا تھوڑا کر کے لیا جائے۔
وزیر اعلیٰ سندھ نے صوبے کے عوام کے لیے بڑے ریلیف کا فیصلہ کرتے ہوئے کیسکو، سیپکو اور کے الیکٹرک ہدایت کرتے ہوئے کہا کہ جن افراد کا بل پانچ ہزار روپے تک ہے ان سے اس مہینہ بل نہ لیا جائے۔ دو مہینے میں کوئی بجلی یا گیس کنکشن بھی نہ کاٹے جائیں۔
صوبے کو لاک ڈاؤن کرنے کے علاوہ اور کوئی راستہ نہیں، وزیر اعلیٰ سندھ
وزیر اعلیٰ نے گھر اور دکان مالکان کو بھی ہدایت کی کہ وہ کرایہ وصولی میں لوگوں کو رعایت دیں، مراد علی شاہ نے کہا کہ وفاقی حکومت سے درخواست کریں گے کہ پاور اور گیس کمپنیوں کو سپلائی جاری رکھی جائے۔
دریں اثنا، وزیر اعلیٰ مراد علی شاہ نے کہا کہ آج شام وہ اہم اعلان کریں گے، لاک ڈاؤن کا اطلاق پورے صوبے میں ہوگا، اداروں کو اگلے دو ماہ کے یوٹیلیٹی بلز دس قسطوں میں لینے کی ہدایت کر دی ہے۔ انھوں نے کہا کہ سوائے لاک ڈاؤن کے میرے پاس اب کوئی اور راستہ نہیں، انتظامیہ الرٹ رہے گی، بغیر خاص وجہ کے روڈ پر لوگوں کو آنے نہیں دیا جائے گا، اب کے فیصلےسے عوام کو محتاط ہو کر گھروں پر بیٹھنا ہے، ہم لاک ڈاؤن کی طرف جا رہے ہیں، آج ہی لاک ڈاؤن کا اعلان کریں گے۔
