راولپنڈی : آرمی چیف جنرل قمرباجوہ آج یوم دفاع کی تقریب سے خطاب کریں گے ، یوم دفاع کی تقریب سیلاب کے باعث ملتوی کی گئی تھی۔
تفصیلات کے مطابق سیلاب کےباعث ملتوی ہونے والی یوم دفاع کی تقریب آج ہوگی، تقریب میں آرمی چیف جنرل قمرباجوہ خطاب کریں گے۔
تقریب آرمی آڈیٹوریم میں منعقد ہوگی، جس میں 6 ستمبر 1965 کو مادر وطن کے دفاع میں عظیم قربانیاں دینے والے شہداء اور فاتحین کو خراج عقیدت پیش کرنے کے لیے فوجی افسران اور دیگر شریک ہوں گے۔
یاد رہے ہر سال یوم دفاع و شہدا کی یاد میں مرکزی تقریب 6 ستمبر کو منعقد کی جاتی ہے لیکن اس سال ملک کے مختلف حصوں میں سیلاب کی وجہ سے ہونے والی مون سون بارشوں کے متاثرین کے ساتھ اظہار یکجہتی کے لیے اسے ملتوی کر دیا گیا تھا۔
خیال رہے آرمی چیف جنرل قمرجاویدباجوہ کے الوداعی دورے جاری ہے، آرمی چیف جنرل قمر جاوید باجوہ نے کوئٹہ گیریژن کا دورہ کیا، آئی ایس پی آر کے مطابق سپہ سالار نے افسران اور جوانوں سے ملاقات کی۔
پاک فوج کے شعبہ تعقات عامہ آئی ایس پی آر کے مطابق کوئٹہ گیریژن کے دورے کے موقع پر آرمی چیف نے یادگارشہداء پرحاضری دی اور پھول چڑھائے۔
جنرل قمر جاوید باجوہ نے افسران اور جوانوں سے بات چیت کرتے ہوئے سیلابی صورتحال کے دوران صوبائی حکومت کی مدد اور امدادی کاموں پر ان کے کردار کو سراہا۔
اس کے علاوہ آرمی چیف نے صوبے میں امن و استحکام کیلئے کوئٹہ کور کی کوششوں کی تعریف کی، انہوں نے شیخ محمد بن زید النہیان انسٹی ٹیوٹ آف کارڈیالوجی کوئٹہ کا بھی افتتاح کیا۔
جنرل قمر جاوید باجوہ کا کہنا تھا کہ کوئٹہ میں متحدہ عرب امارات کے تعاون سے قائم 120 بستروں کی پہلی کارڈیک سہولت ہے، یہ کارڈیک انسٹی ٹیوٹ کوئٹہ میں بلوچستان کی آبادی کی ہر ممکن خدمت کرے گا۔
