کراچی: کے الیکٹرک نے کراچی کے علاقے سرجانی میں ہونے والے واقعے کو افسوس ناک قرار دیتے ہوئے اسے کے الیکٹرک ٹیموں پر حملے کے مترادف قرار دے دیا ہے۔
تفصیلات کے مطابق گزشتہ روز کراچی میں سرجانی ٹاؤن سیکٹر فور سی میں بجلی کے کنڈے ختم کرنے پر کنڈا مافیا کے غنڈوں نے وارڈ کونسلر محمد حبیب کو گولی مار کر قتل کر دیا، کونسلر کا تعلق جماعت اسلامی سے تھا۔
کے الیکٹرک نے واقعے پر رد عمل میں کہا ہے کہ ’’ہم سرجانی میں ہونے والے افسوس ناک واقعے کو کے الیکٹرک ٹیموں پر حملہ کے مترادف سمجھتے ہیں، اور انصاف کے حصول کے لیے متاثرہ خاندان اور علاقہ مکینوں کے ساتھ اظہار یکجہتی کرتے ہیں۔‘‘
ترجمان نے کہا ہے کہ سرجانی میں غیر قانونی نیٹ ورک کے خلاف کاروائیوں کے دوران کے الیکٹرک ٹیموں کو پرتشدد حملوں کا کئی بار سامنا کرنا پڑا، کنڈا مافیا کے ساتھ ملی بھگت کا تاثر سراسر بے بنیاد ہے۔
بجلی کا کنڈا لگانے پر جھگڑا : فائرنگ سے جماعت اسلامی کا کونسلر جاں بحق
ترجمان نے کہا قانون نافذ کرنے والے اداروں سے بھرپور مدد کی درخواست کرتے ہیں، تمام طبقات سے بھی اپیل ہے کہ اجتماعی طور پر اس طرح کے واقعات کی بھرپور مذمت کی جائے، بجلی چوری کا خاتمہ کسی ایک کا کام نہیں، ہم سب کو مل کر اس مسئلے کو حل کرنا ہے۔
