ریاض: سعودی وزارت محنت وسماجی بہبود نے صحت کے شعبے سمیت چار طرح کے اداروں کو اپنا عملہ دوسرے متعلقہ اداروں کو عارضی طور دینے کی مشروط اجازت دے دی۔
تفصیلات کے مطابق سعودی عرب میں شعبہ صحت سمیت چار اداروں کو مشروط اجازت اس صورت میں دی جائے گی جب عملے میں غیرملکی کارکنان 20 فیصد سے زیادہ نہ ہوں۔ دو سال کے دوران عملہ 12 ماہ سے زیادہ مدت کے لیے عاریتاََ نہ دیا جائے، دونوں ادارے ایک جیسا کام کر رہے ہوں۔
عاریتاََ عملے کی فراہمی کا کام اجیر سسٹم کے مطابق انجام دینا ہوگا، پہلے اجیر سسٹم میں اندراج کرانا ہوگا، عملہ فراہم کرنے والے ادارے کی جانب سے کارکنان کی خدمات کا معاہدہ تحریر کیا جائے گا۔
وزارت محنت وسماجی بہبود نے چار طرح کے اداروں کو اپنا عملہ عاریتاََ فراہم کرنے کی منظوری دی ہے، ان میں صحت، فارمیسیاں، کھیتی باڑی اور تعمیرات کا شعبہ شامل ہے۔
وزارت محنت نے اپنی ویب سائٹ پر اعلامیے میں بتایا کہ نجی صحت اداروں کو یہ سہولت اس وجہ سے بھی دی گئی ہے کہ تاکہ انہیں قوانین محنت کی خلاف ورزیوں سے تحفظ حاصل ہوجائے۔ عملی طور پر صحت ادارے اپنا عملہ دوسرے صحت اداروں کو مہیا کرتے رہتے ہیں، بعض اوقات کئی ادارے اپنے عملے کا تبادلہ بھی کرتے ہیں۔
