پشاور: محکمہ سیاحت و ثقافت نے صوبے کے نوجوان مرد و خواتین کی صلاحیتوں کو ابھارنے کے لیے ایک اور مقابلے کا اہتمام کر لیا ہے۔
تفصیلات کے مطابق خیبر پختون خوا کے نوجوان مرد و خواتین کی صلاحیتوں کو اجاگر کرنے کے لیے پشاور میں محکمہ سیاحت و ثقافت کھانے پکانے کے مقابلے منعقد کرنے جا رہا ہے، جن میں صوبہ بھر سے مرد و خواتین حصہ لے رہے ہیں۔
کوکنگ اسکلز کمپٹیشن کے عنوان سے منعقدہ مقابلوں میں پشاوری مٹن کڑاہی، نمکین تکہ، کابلی پلاؤ، چپلی کباب سمیت چترال، بنوں، ڈی آئی خان، سوات اور صوبے کے دیگر اضلاع کے پسندیدہ کھانے 4 روزہ مقابلوں میں دیکھنے اور چکھنے کو ملیں گے۔
ڈائریکٹر جنرل یوتھ افیئرز سلیم جان کا کہنا ہے کہ کوگنگ مقابلوں کا مقصد صوبے کے باصلاحیت نوجوانوں کو آگے لانا ہے، مستقبل میں اس طرح کے دیگر ایونٹس بھی منعقد کیے جائیں گے، جن سے باصلاحیت ہنر مندوں کو آگے آنے کا موقع ملے گا۔
ترجمان محکمہ سیاحت کے مطابق چار روزہ مقابلوں کے پہلے 2 دن کوکنگ مقابلوں میں شریک 14 سے 29 سال کی عمر کے نوجوانوں کے آڈیشن لیے جا رہے ہیں، اس کے بعد 20 نوجوان منتخب ہوں گے جن کے درمیان مقابلے ہوں گے۔
مقابلوں میں لذیذ ذائقہ دار کھانا پکانے والے 5 بہترین شیفس کا انتخاب ہوگا اور پھر آخری دن 5 امیدواروں کے درمیان مقابلہ ہوں گے، جب کہ بہترین کارکردگی دکھانے والے مرد و خواتین میں انعامات تقسیم کیے جائیں گے۔
