اسلام آباد : ملک بھر میں گزشتہ24گھنٹوں میں کورونا سے47افراد انتقال کرگئے، وائرس میں مبتلا ایک ہزار 918نئے کیسز رپورٹ ہوئے ہیں۔
تفصیلات کے مطابق نیشنل کمانڈ آپریشن سینٹر ( این سی او سی ) کی تازہ رپورٹ میں کہا گیا ہے کہ گزشتہ 24گھنٹوں میں ملک بھر میں کورونا کے23ہزار11ٹیسٹ کیے گئے جس کے نتیجے میں کورونا کے1918کیسزرپورٹ ہوئے ہیں۔
این سی او سی کے مطابق کورونا کے فعال کیسز کی تعداد57ہزار886ہوگئی، ملک کے مختلف شہروں اور قرنطینہ مراکز میں زیرعلاج مریضوں میں سے1604کی حالت تشویشناک ہے۔
نیشنل کمانڈ آپریشن سینٹر ( این سی او سی ) کے مطابق ملک میں گزشتہ24گھنٹوں میں کورونا سے47افراد انتقال کرگئے، کورونا سے مجموعی اموات 5ہزار522ہوگئیں، گزشتہ 24گھنٹےمیں 14ہزار772کورونامریض صحت یاب ہوئے، اب تک ایک لاکھ 98ہزار509مریض صحت یاب ہوچکے ہیں۔
مزید پڑھیں : کورونا وائرس کے تصدیق شدہ و مشتبہ مریضوں میں 60 فیصد کمی کا انکشاف
واضح رہے کہ محکمہ صحت پنجاب کی ڈیٹاسورس تحقیقاتی رپورٹ میں لاہور میں کورونا کے تصدیق شدہ ومشتبہ مریضوں میں 60فیصد کمی کا انکشاف ہوا ہے۔ رپورٹ میں بتایا گیا ہے کہ شہر میں 8سرکاری لیبارٹریاں کام کر رہی ہیں اور 8 سرکاری لیبارٹریوں کی یومیہ ٹیسٹنگ استعداد 5750ہے۔
محکمہ صحت کی رپورٹ میں کہا گیا ہے کہ گزشتہ7 روز سے یومیہ مریضوں کی تعداد 200 سے زائد سامنے آ رہی ہے جبکہ جولائی سے پہلے یومیہ مریضوں کی تعداد 1000سے زائد تھی۔
