The news is by your side.

Advertisement

کورونا ویکسین کون سے مریض استعمال نہیں کرسکتے، سعودی وزارت صحت نے بتادیا

ریاض : کورونا ویکسی نیشن سے متعلق سعودی وزارت صحت نے خبردار کیا ہے کہ کچھ خاص نوعیت کے مریض یہ ویکسین استعمال نہیں کرسکتے جب تک کہ وہ اپنے ڈاکٹر سے رجوع نہ کریں۔

اس حوالے سے سعودی وزارت صحت کے ترجمان ڈاکٹرمحمد العبدالعالی نے کہا ہے کہ وہ افراد جنہیں شدید الراجی کی شکایت رہتی ہے انہیں ویکسین لینے کی سفارش نہیں کریں گے، ویکسین لینے سے قبل ڈاکٹر کو اپنی حالت کے بارے میں آگاہ کریں۔

سعودی ذرائع ابلاغ کے مطابق ترجمان وزارت صحت نے پریس کانفرنس کے دوران ایک سوال کا جواب دیتے ہوئے کہا کہ وہ افراد جنہیں کھانے وغیرہ سے معمولی سی الرجی کی شکایت ہو انہیں ویکسین دی جاسکتی ہے۔

انہوں نے بتایا کہ الرجی کے وہ مریض جن کی حالت نازک ہوجاتی ہے اور انہیں الرجی کی وجہ سے ہسپتال میں داخل کرانا پڑتا ہے یا وہ ہمیشہ اس مرض سے بچاؤ کے لیے اینٹی الرجی کے انجکشن لیتے ہیں ایسے مریضوں کے لیے ہم ویکسین لینے کی سفارش نہیں کرسکتے۔

ذرائع کے مطابق دوسری جانب ڈاکٹر عبدالعالی نے مزید کہا کہ وائرس کے خلاف جو ویکسین دی جارہی ہے اس کی دوسری خوراک لینا انتہائی اہم ہے کیونکہ دوسری خوراک کے بعد ہی جسم اس مرض کے خلاف اینٹی باڈیز بنا کر قوت مدافعت پیدا کرتا ہے۔

دوسری خوراک کے حوالے سے ڈاکٹر عبدالعالی کا کہنا تھا کہ پہلی ویکسین کے 21 دن بعد دوسری خوراک دی جاتی ہے۔ وزارت کی جانب سے مقررہ صحتی ایپ پر رجسٹر کرنے کے بعد پروگرام کے مطابق دوسری خوراک کے لیے بھی شیڈول جاری کیا جاتا ہے۔

واضح رہے سعودی فوڈ اینڈ ڈرگ اتھارٹی نے مملکت کے لیے فائزر اور بائیو این ٹیک کی ویکسین کی منظوری دی تھی۔ ویکسین لگانے کے لیے صحتی ایپ پر رجسٹریشن کا آغاز منگل سے کیا گیا تھا جس کے تحت اب تک چار لاکھ کے قریب افراد نے خود کو رجسٹر کروایا ہے۔

Comments

یہ بھی پڑھیں