لندن: برطانوی وزیر اعظم بورس جانسن نے کہا ہے کہ ملک میں کورونا وائرس انتہا سے گزر چکا اب زور ٹوٹ رہا ہے۔
ایک بیان میں انہوں نے کہا کہ کورونا انفیکشن بلند ترین شرح سے گزر چکا ہے اور اب وبا سے انفیکشن میں بتدریج کمی آ رہی ہے۔
بورس جانسن نے کہا کہ اگلے ہفتے معیشت کا پہیہ چلانے کا منصوبہ بتائیں گے، بچوں کی اسکول واپسی کی تفصیلات بھی اگلے ہفتے بتائیں گے جب کہ ورکرز کی کام پر واپسی کا منصوبہ بھی تیار کر لیا ہے۔
وزیراعظم نے کہا کہ برطانیہ میں کرونا سے 26711 اموات ہوئی ہیں لیکن کسی ایک بھی مریض کو وینٹی لیٹر یا آئی سی یو کی کمی کا سامنا نہیں کرنا پڑا، اگر این ایچ ایس نہ بچاتے تو پانچ لاکھ اموات کا خطرہ تھا۔
بورس جانسن نے لاک ڈاؤن میں نرمی سے ایک اور تباہ کن لہر کے خدشے کا اظہار کرتے ہوئے کہا کہ بندشوں میں نرمی کی گئی تو ایک اور لہر کا خطرہ ہے۔
واضح رہے کہ 25 مارچ کے بعد آج پہلی بار وزیراعظم میڈیا کے سامنے آئے ہی، اپریل کے شروع میں بورس جانسن کو اسپتال لے جایا گیا تھا اور وہ کورونا سے صحتیاب ہونے کے بعد آفس جوائن کر چکے ہیں۔
