The news is by your side.

Advertisement

وزارت فوڈ سیکیورٹی کے 50 ملازمین میں کرونا وائرس کی تصدیق

اسلام آباد: وزارت فوڈ سیکیورٹی کے 50 ملازمین کا کرونا وائرس ٹیسٹ مثبت آگیا، بیمار ملازمین کو قرنطینہ میں جانے کی ہدایت کرتے ہوئے بقیہ ملازمین کو بھی گھروں سے کام کرنے کی ہدایت کردی گئی۔

تفصیلات کے مطابق وزارت فوڈ سیکیورٹی میں 50 ملازمین کے ٹیسٹ پازیٹو آگئے جس کے بعد وزارت غذائی تحفظ کو 2 دن کے لیے بند کر دیا گیا۔

ذرائع کا کہنا ہے کہ متاثرہ ملازمین کو گھروں میں رہنے کی ہدایت جاری کردی گئی، دیگر ملازمین ضروری سرکاری امور گھر سے نمٹائیں گے۔

ذرائع کے مطابق وزارت میں گزشتہ ہفتے 16 اور آج مزید 29 اہلکاروں کے ٹیسٹ پازیٹو آئے ہیں، وزارت میں کل 90 رکنی عملہ ہے جس میں سے 50 کرونا وائرس کا شکار ہوچکے ہیں۔

وزارت فوڈ سیکیورٹی کا ایک ملازم کرونا وائرس کے باعث انتقال بھی کر چکا ہے۔

خیال رہے کہ ملک بھر میں کرونا وائرس کے کیسز میں ہولناک اضافہ ہورہا ہے، گزشتہ 24 گھنٹوں کے دوران ملک میں مزید 101 اموات ہوئیں جس کے بعد اموات کی تعداد 2 ہزار 356 ہوچکی ہے۔

ملک بھر میں گزشتہ 24 گھنٹوں کے دوران کرونا وائرس کے 5 ہزار 834 نئے کیسز سامنے آئے جس کے بعد کرونا کے مصدقہ کیسز کی تعداد 1 لاکھ 19 ہزار 536 ہوگئی ہے۔

Comments

یہ بھی پڑھیں