ریاض: سعودی وزارت صحت کا کہنا ہے کہ کرونا وائرس سے نمٹنے کے لیے 25 اسپتال تیار کرلیے گئے ہیں جن میں کرونا کے مریضوں کو الگ تھلگ رکھنے کے لیے 22 سو سے زیادہ بستر مختص ہیں۔
سعودی ویب سائٹ کے مطابق سعودی وزارت صحت کے ترجمان نے ایک پریس کانفرس کے دوران کہا ہے کہ سعودی عرب اب تک کرونا وائرس سے پوری طرح سے پاک ہے اور ایک بھی مریض ریکارڈ پر نہیں آیا۔
مذکورہ پریس کانفرنس میں صحت، حج، عمرہ اور خارجہ کی وزارتوں کے نمائندے شریک ہوئے۔ تمام نمائندوں نے بتایا کہ سعودی عرب نے ہر سطح پر احتیاطی تدابیر اختیار کی ہیں۔ کسی ادارے کی لیب سے جاری کردہ رپورٹ میں کرونا وائرس کا کوئی مریض ریکارڈ پر نہیں آیا۔
وزارت صحت کے ترجمان کا کہنا ہے کہ اس حوالے سے جو بھی تبدیلی ہوگی اس کے مطابق مزید احتیاطی تدابیر کی جائیں گی، ضرورت پڑی تو اسکولوں اور کالجوں میں تدریسی عمل بھی معطل کردیا جائے گا۔
پریس کانفرنس میں بتایا گیا کہ کرونا وائرس سے نمٹنے کے لیے 25 اسپتال بھی تیار کرلیے گئے ہیں جن میں کرونا کے مریضوں کو الگ تھلگ رکھنے کے لیے 22 سو سے زیادہ بستر مختص ہیں۔
ترجمان وزارت صحت کے مطابق کرونا وائرس سے نمٹنے کے لیے وزارت تعلیم کے افسران نے خصوصی اسکیمیں تیار کر رکھی ہیں، ہیلتھ ایمرجنسی کے لیے اسپیشل سینٹر مخصوص کردیے گئے ہیں جبکہ ہنگامی حالات سے نمٹنے کے لیے اسپیشل آپریشن سینٹر قائم کیا گیا ہے جو وائرس کے حوالے سے معلومات جمع کرتا رہے گا۔
