ریاض: سعودی عرب نے کرونا وائرس کے لیے فائزر کی ویکسین منظور کر لی۔
تفصیلات کے مطابق سعودی فوڈ اینڈ ڈرگ اتھارٹی نے کرونا وائرس کے لیے امریکی کمپنی فائزر کی تیار کردہ ویکسین کو مملکت میں رجسٹر کرنے کی اجازت دے دی۔
فائزر کمپنی کی جانب سے 24 نومبر کو فوڈ اینڈ ڈرگ اتھارٹی سے باقاعدہ ویکسین کی رجسٹریشن کے لیے اجازت طلب کی گئی تھی، اتھارٹی نے درخواست پر مختلف پہلوؤں سے غور کرنے کے بعد اسے منظور کر لیا، دوسری طرف کمپنی کا کہنا تھا کہ سعودی عرب میں ویکسین کو رجسٹر کرنے کے بعد اس کی امپورٹ اور استعمال کے مرحلے کا آغاز کیا جائے گا۔
سعودی میڈیا کے مطابق اتھارٹی نے ویکسین کی رجسٹریشن کی منظوری سے قبل مختلف ماہرین سے مشاورت بھی کی اور ویکسین کی تجرباتی رپورٹس کا جائزہ لیا، ویکسین سے متعلق ہر طرح کی تسلی کے بعد ہی رجسٹریشن کی منظوری دی گئی۔
بحرین نے فائزر کی ویکسین کے استعمال کی منظوری دے دی
سعودی ایف ڈی اے کا کہنا تھا کہ میڈیکل اور میڈیسن کے ماہرین نے فائزر اور بائیو این ٹیک کی مشترکہ ویکسین سے متعلق تمام تجرباتی رپورٹس کا باریک بینی سے مطالعہ کیا۔
ویکسین کی منظوری کے بعد اب اس کی مملکت میں آمد اور استعمال کے طریقہ کار سے متعلق صحت کمیٹیاں اپنا کردار ادا کریں گی، ویکسین کی ہر شپمنٹ سے نمونے حاصل کر کے ان کا لیبارٹری میں معائنہ کیا جائے گا تاکہ اس کے معیار کی تصدیق ہو۔
