اسلام آباد : احتساب عدالت نے عبدالغنی مجید کے خلاف جعلی بینک اکاونٹس کا 14 واں ریفرنس واپس کردیا اور کہا نئے نیب قانون کے بعد جعلی بینک اکاونٹس کا ریفرنس احتساب عدالت میں ٹرائل نہیں ہوسکتا۔
تفصیلات کے مطابق احتساب عدالت نے جعلی بینک اکاونٹس کیسز کے 14 کرپشن ریفرنسز ختم کردیے۔
عدالت نےعبدالغنی مجیدکےخلاف جعلی بینک اکاونٹس کا 14 واں ریفرنس واپس کردیا اور کہا کہ نئے نیب قانون کے بعد جعلی بینک اکاونٹس کا ریفرنس احتساب عدالت میں ٹرائل نہیں ہوسکتا۔
ریفرنس میں عبدالغنی مجید، محمد شبیر، محمد حنیف،عابداللہ شاہ اوردیگر ملزمان نامزد تھے۔
احتساب عدالت اسلام آباد کے جج محمد بشیر نے ریفرنس واپس بھیجنے کا حکمنامہ جاری کردیا ، جس میں کہا ہے کہ ریفرنس کے مطابق نجی افراد نے بینامی کمپنی کے ذریعے پلاٹ خریدا، پلاٹ کی مالیت 24 کروڑ 69 لاکھ 60 ہزار روپے تھی۔
حکم نامے میں کہا کہ ملزمان نے 17 کروڑ 30 لاکھ روپے کی ادائیگی جعلی اکاؤنٹس سےکی ، باقی کے 5 کروڑ 83 لاکھ 25 ہزار روپے نقد رقم ادا کی گئی۔
احتساب عدالت کا کہنا تھا کہ معاملےکی کل رقم 24 کروڑ سے زائد ہے جو کہ 50 کروڑ سے کم ہے، 50 کروڑ سے کم کے مقدمات پر احتساب عدالت کا دائرہ اختیار نہیں بنتا، عدالت ریفرنس چیئرمین نیب کو واپس بھیجنے کا حکم دیتی ہے۔
خیال رہے احتساب عدالتیں اب تک 300کرپشن ریفرنسزدائرہ اختیارختم ہونے پر واپس کرچکی ہیں۔
