ملتان : عدالت نے پی ٹی آئی رہنما شاہ محمود قریشی کی نظر بندی کے خلاف درخواست پراعتراض عائد کرتے ہوئے درخواست لاہور پرنسپل سیٹ پر بھجوانے کا حکم دے دیا۔
تفصیلات کے مطابق پی ٹی آئی رہنما شاہ محمود قریشی کی نظربندی کیخلاف ہائیکورٹ ملتان بینچ میں درخواست پر سماعت ہوئی۔
عدالت نے شاہ محمودقریشی کی نظر بندی کے خلاف درخواست پراعتراض لگادیا اور شاہ محمودقریشی کی رہائی کی درخواست لاہور پرنسپل سیٹ پر بھجوانے کا حکم دے دیا۔
زین قریشی نےایڈووکیٹ رانا آصف سعید کے توسط سے درخواست دائر کر رکھی تھی ، جس میں مؤقف اختیار کیا کہ لاہورمیں پر امن احتجاج کے دوران شاہ محمود قریشی کو گرفتار کیا گیا ہے، شاہ محمود قریشی کی گرفتاری غیر قانونی ہے۔
درخواست میں کہا گیا کہ شاہ محمود قریشی سیاسی جماعت کے رہنما اور پرامن شہری رہےہیں، عدالت کےفیصلوں کےمطابق کسی سیاسی رہنما کو نظر بند نہیں رکھا جا سکتا۔
دائر درخواست میں کہا تھا کہ وفاقی حکومت کی ایماپرشاہ محمود قریشی کو نظر بندی کیا گیاہے،استدعا ہے کہ شاہ محمود قریشی کو فوری رہا کیا جائے۔
