راولپنڈی :لاہور ہائیکورٹ راولپنڈی بینچ نے 190 ملین پاؤنڈ کیس میں عوامی مسلم لیگ کے سربراہ شیخ رشید کا نام ای سی ایل سے نکالنے کاحکم دے دیا۔
تفصیلات کے مطابق لاہور ہائیکورٹ راولپنڈی بینچ میں 190 ملین پاؤنڈ کیس میں عوامی مسلم لیگ کے سربراہ شیخ رشید کا نام ای سی ایل میں ڈالنے کیخلاف درخواست کی سماعت ہوئی۔
جسٹس صداقت علی خان،جسٹس مرزاوقاص رؤف پرمشتمل بینچ نے سماعت کی ،شیخ رشید احمد وکیل سردارعبدالرازق کے ساتھ ہائیکورٹ ڈویژن بینچ میں پیش ہوئے جبکہ ایڈیشنل سیکرٹری داخلہ اور نیب پراسیکیوٹر بھی عدالت میں پیش ہوئے۔
عدالت نے ایڈیشنل سیکرٹری داخلہ سے استفسار کیا سیکرٹری داخلہ کہاں ہے؟ جس پر ایڈیشنل سیکرٹری داخلہ نے بتایا کہ سیکریٹری داخلہ دستیاب نہیں سپریم کورٹ میں مصروف ہیں۔
عدالت نے سوال کیا کہ شیخ رشید کا نام ای سی ایل میں کیوں ڈالا گیا ہے؟ ایڈیشنل سیکرٹری داخلہ نے بتایا کہ نیب نےشیخ رشید کا نام ای سی ایل میں ڈالنے کی سفارش کی تھی۔
نیب پراسیکیوٹر نے عدالت کو بتایا کہ 190 ملین پاؤنڈ اسکینڈل کی تحقیقات میں شیخ رشید کا نام ہے، تحقیقات کے بعد نیب نے ملزمان کی فہرست سے شیخ رشید کا نام نکال دیاتھا، جس پر عدالت کا کہنا تھا کہ شیخ رشید اس کیس میں مطلوب نہیں تو نام کس نے ای سی ایل میں ڈالا۔
لاہورہائیکورٹ راولپنڈی ڈویژن بینچ نے ایڈیشنل سیکرٹری داخلہ پر برہمی کا اظہار کرتے ہوئے کہا کہ 2گھنٹے دے رہے ہیں تفصیلی رپورٹ جمع کرائیں ورنہ آپ کے خلاف کارروائی کریں گے۔
:لاہور ہائیکورٹ راولپنڈی بینچ نے شیخ رشید کا نام ای سی ایل سے نکالنے کاحکم دیتے ہوئے سیکرٹری داخلہ کو شیخ رشید کا نام ای سی ایل میں ڈالنے سے متعلق رپورٹ پیش کرنے کا بھی حکم دیا۔
