اسلام آباد : احتساب عدالت نے پارک لین ریفرنس میں سابق صدر آصف زرداری پر فرد جرم کرنے کے لئے 25 مارچ کی تاریخ مقررکردی اورتمام ملزمان کوحاضری یقینی بنانے کا حکم دیا۔
تفصیلات کے مطابق اسلام آباد کی احتساب عدالت میں پارک لین ریفرنس کی سماعت ہوئی، عدالت نے سابق صدرآصف زرداری کی حاضری سے استثنیٰ کی درخواست منظور کرتے ہوئے ریفرنس میں فردجرم عائد کرنے کیلئے پچیس تاریخ مقرر کردی، عدالت نے ہدایت کی کہ آئندہ سماعت پر ملزمان کی حاضری یقینی بنائی جائے۔
دوسری جانب احتساب عدالت میں سابق صدر آصف زرداری اورفریال تالپورکےخلاف میگا منی لانڈرنگ کیس کی سماعت ہوئی ، فریال تالپور سمیت دیگرملزمان عدالت میں پیش ہوئے تاہم آصف زرداری علالت کے باعث پیش نہ ہوسکے۔
دوران سماعت آصف زرداری کی حاضری سے استثنیٰ کی درخواست دائر کی گئی جبکہ فریال تالپور سمیت دیگر ملزمان نے عدالت میں حاضریاں لگوائیں ، فاضل جج نے استفسار کیا کہ خواجہ انور مجید کا کیا بنا؟
نیب پراسیکیوٹر نے بتایا 2 ملین کے اخراجات کی درخواست موصول ہوئی، ملزم گرفتارہے ویڈیو لنک کےذریعےفردجرم عائد کی جائے، ویڈیو لنک کےلیےجیل حکام سمیت متعلقہ حکام کوہدایات جاری کی جائیں۔
جس پر جج احتساب عدالت نے کہا اس حوالے سے تحریری درخواست دے دیں، وکیل لطیف کھوسہ کا کہنا تھا کہ ویڈیو لنک پر حکومت کی جانب سے صوبائی حکومت کو لکھا جائے گا، میمو کیس میں بھی ملزم کا بیان ویڈیو لنک پر لیا گیا۔
جج احتساب عدالت کا کہنا تھا معاملےکولیگل کور کیسے دیں گے، کیا عدالت اپنا نمائندہ بھجوائے گی، وکیل صفائی فاروق ایچ نائیک نے کہا جی رجسٹرار عدالت کو بھجوایا جا سکتا ہے، مشرف نےبھی بیان ویڈیو لنک پردیا،یہاں سےکوئی نہیں گیا۔
نیب پراسیکیوٹر نے کہا پلی بارگین کو حتمی شکل دے دی گئی ہے، مختلف کیسز میں واجبات کی ادائیگی کا طریقہ کار طے کر لیا گیا ہے، ہیڈ کوارٹرز جلد پراسس شروع کر دے گا، عدالت نے دلائل کے بعد ویڈیولنک پربیان کے لیے درخواست جمع کرانےکی ہدایت کرتےہوئے سماعت ملتوی کردی۔
