ٹوکیو: جاپان میں خاتون کرونا وائرس سے صحت یاب ہونے کے بعد دوبارہ اس مہلک وائرس میں مبتلا ہوگئیں۔
غیرملکی خبررساں ادارے کی رپورٹ کے مطابق اوساکا کی خاتون میں پہلی دفعہ گزشتہ ماہ جنوری میں وائرس کی تصدیق ہوئی تھی جس کے بعد انہیں یکم فروری کو صحت یاب ہونے کے بعد اسپتال سے ڈسچارج کیا گیا تھا۔
ذرائع کا کہنا ہے کہ جاپان میں ایک ہی مریض میں دوبارہ سے وائرس سے متاثر ہونے کا یہ پہلا کیس ہے جبکہ چین میں اس نوعیت کا کیس پہلے ہی سامنے آچکا ہے۔
رپورٹ کے مطابق 40 سالہ خاتون کو پہلی بار 29 جنوری کو کرونا وائرس سے متاثر ہونے کی تصدیق ہوئی تھی۔
وہ جنوری میں اس وبا کا مرکز ووہان سے آنے والے سیاحوں کے ساتھ ٹور بس میں رہنما کے طور پر کام کررہی تھیں بس کے ڈرائیور کو بھی وائرس کی تشخیص ہوئی تھی۔
اسپتال سے فارغ ہونے کے بعد ان میں 6 فروری کو اس وائرس کا تجربہ کیا تھا اور ان کا ٹیسٹ منفی آیا تھا لیکن انہیں کھانسی کی شکایت تھی۔
رپورٹ میں بتایا گیا ہے کہ 21 فروری کو وہ گلے کی سوزش اور سینے میں تکلیف کی شکایت کرتے ہوئے وہ ڈاکٹرز کے پاس واپس گئیں تو ان کے ٹیسٹ کیے گئے اور دوبارہ وائرس کی تصدیق ہوئی۔
واضح رہے کہ جاپان میں کم ازکم 186 افراد کرونا وائرس سے متاثر ہوچکے ہیں جبکہ اس مہلک وائرس سے 4 افراد زندگی کی بازی ہار چکے ہیں۔
