پشاور: خیبرپختون خواہ حکومت نے کرونا کی بگڑتی صورت حال کے پیش نظر صوبے میں ایس او پیز پر عمل درآمد کے لیے فوج کی خدمات لینے اور ویکسین نہ لگوانے والوں کی موبائل سم بند کرنے کا فیصلہ کیا ہے۔
اے آر وائی نیوز کے مطابق وزیر اعلیٰ خیبرپختون خواہ محمود خان کی زیر صدارت صوبائی ٹاسک فورس برائے انسداد کرونا کا اجلاس ہوا، جس میں کور کمانڈر پشاور، چیف سیکریٹری، آئی جی پولیس، اراکین صوبائی کابینہ اور متعلقہ انتظامی حکام نے شرکت کی۔
ٹاسک فورس اراکین نے صوبے کے بعض اضلاع میں کرونا کیسز کی بڑھتی ہوئی شرح اور شہریوں کی جانب سے ایس او پیز پر عمل درآمد نہ کرنے پر تشویش کا اظہار کیا۔
صوبائی حکومت نے کرونا پابندیوں کو مزید سخت کرنے، زیادہ شرح والے علاقوں میں اسمارٹ لاک ڈاؤن کے نفاذ اور ایس او پیز پر عمل درآمد کے لیے فوج کی خدمات حاصل کرنے کا فیصلہ کیا۔
اجلاس میں پندرہ ستمبر تک کرونا ویکسین نہ لگوانے والے شہریوں کی موبائل سم بند کرنے پر غور بھی کیا گیا۔ اراکین نے ہفتے میں دو روز کاروباری، تجارتی مراکز بند رکھنے میں توسیع کی منظوری بھی دی۔
