کراچی: صوبہ سندھ کے دارالحکومت کراچی میں کرونا وائرس کے بڑھتے ہوئے کیسز کے پیش نظر، وزیر اعلیٰ سندھ سید مراد علی شاہ نے شہر میں شام 6 بجے کے بعد غیر ضروری نقل و حرکت پر مکمل طور پر پابندی لگانے کی ہدایت کردی۔
تفصیلات کے مطابق وزیر اعلیٰ سندھ سید مراد علی شاہ کی زیر صدارت صوبائی کرونا ٹاسک فورس کا اجلاس ہوا، اجلاس میں صوبائی وزرا، چیف سیکریٹری، آئی جی پولیس، ڈاکٹر باری، ڈاکٹر فیصل، ڈاکٹرسارہ خان، ڈاکٹر سعید قریشی، رینجرز اور دیگر اداروں کے نمائندے شریک ہوئے۔
سیکریٹری صحت کاظم جتوئی نے اجلاس کو بریفنگ دیتے ہوئے بتایا کہ صوبے بھر میں کرونا وائرس کیسز کی شرح 12.7 فیصد ہوگئی ہے، کراچی میں 26.32 فیصد کووڈ کیسز ہیں۔
وزیر اعلیٰ سندھ نے کہا کہ 24 جولائی کو کراچی میں کیسز کی شرح 20.72 فیصد تھی، 25 جولائی کو 28.24 فیصد ہوگئی جبکہ 26 جولائی کو شرح 26.32 فیصد تک جا پہنچی۔ یہ سخت پریشانی کی بات ہے کہ کرونا کیسز بڑھ رہے ہیں۔
انہوں نے کہا کہ حیدر آباد میں بھی مثبت کیسز کی شرح 10 فیصد ہوگئی ہے، کراچی شرقی میں شرح 33 فیصد، سینٹرل میں 20 فیصد، کورنگی میں 21 فیصد، غرب میں 19 فیصد اور ملیر میں مثبت کیسز کی شرح 17 فیصد ہے۔
وزیر اعلیٰ سندھ نے ہدایت کی کہ کراچی میں شام 6 بجے کے بعد مکمل پابندی لگائی جائیں، کوئی غیر ضروری طور پر گھر سے باہر نہ نکلے۔ مجھے پتہ چلا ہے ٹیوشن سینٹرز چل رہے ہیں، ان کو فوری بند کریں۔
انہوں نے کہا کہ میں دوبارہ جمعہ کے دن کرونا صورتحال کا جائزہ لوں گا، اگر صورتحال بہتر نہ ہوئی تو مزید اقدامات کریں گے۔
وزیر اعلیٰ سندھ نے صوبائی وزرا ناصر شاہ، مرتضیٰ وہاب اور اویس شاہ پر مشتمل کمیٹی قائم کردی، انہوں نے کہا کہ تمام اسٹیک ہولڈرز سے ملاقات کر کے ان کو صورتحال سے آگاہ کریں۔
انہوں نے مزید کہا کہ کمیٹی سیاسی جماعتوں سے بھی بات کرے گی، کووڈ صورتحال پر کوئی سیاست نہیں ہونی چاہیئے۔
