کراچی میں پولیس کا روپ دھارے لٹیرے نے ایک اور اسٹور کا صفایا کردیا، ہر واردات میں ملزم کا حلیہ اور طریقہ ایک جیسا تھا تاہم واضح فوٹیجز کے باوجود بھی قانون کی گرفت سے باہر ہیں۔
تفصیلات کے مطابق لوٹ مار اور چھینا جھپٹی سے تنگ کراچی کے شہری پولیس کے روپ والے چھلاوہ سے پریشان ہیں۔
گروسری اسٹور، میڈیکل اسٹور ہو یا بیکری، ایک ہی روپ اور ملتا جلتا طریقہ واردات سے پولیس بھی پریشان ہیں کہ آخر یہ شخص کون ہے، جو پولیس یونیفارم جیسی خاکی پینٹ پر ٹی شرٹ پہنے وارداتیں کرتا پھر رہا ہے۔
ملزم نے چند روز قبل آرام باغ کے ایک اسٹور پر کیش کاؤنٹر کا صفایا کیا اور قیمتی اشیاء لوٹی جبکہ وہاں موجود تمام افراد کو بھی نہ چھوڑا۔
فوٹیج میں پولیس یونیفارم میں ملبوس ملزم کو اسٹور میں موجود تمام افرادکو نیچے بٹھاتے دیکھا جاسکتا ہے۔
پولیس یونیفارم میں ملبوس ملزم متعدد وارداتیں کرچکا ہے، طارق روڈ پر برگر چین کی بیکری اور شرف آباد کا مشہور میڈیکل اسٹور کو لوٹا ، ہر واردات کی واضح فوٹیج کے باوجود ملزم اب تک قانون کی گرفت سے باہر ہے۔
