بدین: سمندری طوفان بیپر جوائے کے سلسلے میں کور کمانڈر کراچی نے سندھ کے شہر بدین میں ہنگامی کانفرنس طلب کر لی۔
تفصیلات کے مطابق سمندری طوفان سے نمٹنے کے لیے ہر سطح پر اقدامات کیے جا رہے ہیں، کور کمانڈر کراچی نے بھی بدین میں ایک ہنگامی کانفرنس بلائی، جس میں ڈی جی رینجرز سندھ اور جی او سی حیدرآباد سمیت فوجی و سول اداروں کے ذمہ داران نے شرکت کی۔
طوفان سے نمٹنے کے لیے پاک فوج کی بروقت تیاریوں پر کور کمانڈر کراچی نے اطمینان کا اظہار کیا۔ انھوں نے کہا ممکنہ طوفان کے خطرے سے نمٹنے کے لیے وسائل بروئے کار لائے جائیں گے۔
کور کمانڈر کا کہنا تھا کہ اب تک پاک فوج کے دستے ریسکیو کے لیے مختلف مقامات پر پہنچ چکے ہیں، اور کسی بھی صورت عوام کو تنہا نہیں چھوڑیں گے۔
ادھر وزیر اعلیٰ سندھ کی زیر صدارت بھی اہم اجلاس بلایا گیا، جس میں ڈی جی رینجرز اور جی او سی حیدرآباد گیریژن سمیت متعلقہ محکموں کے اعلیٰ حکام نے شرکت کی، اجلاس میں بتایا گیا کہ پاک فوج کے تازہ دم دستے حفاظتی اقدامات کے طور پر تعینات کر دیے گئے ہیں۔
وزیر اعلیٰ مراد علی شاہ نے کراچی میں کیٹی بندر، شاہ بندر اور جاتی کا دورہ بھی کیا، اور سمندری طوفان سے بچاؤ کے اقدامات کا جائزہ اور ساحلی علاقوں کا فضائی معائنہ کیا۔
وزیر اعظم شہباز شریف نے وزیر اعلیٰ سندھ مراد علی شاہ کو ٹیلیفون کر کے سمندری طوفان کی تازہ ترین صورت حال اور اقدامات پر گفتگو کی، انھوں نے وفاق، صوبائی حکومتوں اور اداروں میں مؤثر حکمت عملی پر عمل درآمد یقینی بنانے کی ہدایت بھی کی۔
