لاہور : پی ڈی ایم اے پنجاب نے سمندری طوفان کے پیش نظر تمام اداروں و ضلعی انتظامیہ کو ہائی الرٹ رہنے کی ہدایت کردی۔
تفصیلات کے مطابق سمندری طوفان کے باعث آندھی اور بارش کے پیش نظر پی ڈی ایم اے پنجاب نے تمام اداروں و ضلعی انتظامیہ کو ہائی الرٹ رہنے کی ہدایات جاری کردی۔
ریلیف کمشنر پنجاب کی ہدایت پر صوبائی کنٹرول روم سمیت پنجاب بھر کے ڈسٹرکٹ ایمرجنسی آپریشن سنٹرز کو الرٹ رہنے کی ہدایت جاری کیا گیا۔
پی ڈی ایم اے کا کہنا ہے کہ محکمہ موسمیات کے مطابق سمندری طوفان 14 جون کی صبح تک مزید شمال کی جانب بڑھے گا، سمندری طوفان کی وجہ سے ملک کے بالائی علاقوں میں مغربی ہوائیں 14 جون سے داخل ہونے کا امکان ہے۔
جس کے باعث لاہور ، اسلام آباد، مری، گلیات، راولپنڈی، اٹک، چکوال، سیالکوٹ، گوجرانوالہ، منڈی بہاؤالدین اور نارووال میں آندھی اور گرج چمک کے ساتھ بارش کا امکان ہے جبکہ بعض مقامات پر موسلا دھار بارش اور ژالہ باری کی بھی توقع ہے۔
پی ڈی ایم اے نے بتایا کہ اسی دوران مری کے پہاڑی علاقوں میں لینڈسلائیڈنگ کا بھی خدشہ ہے جبکہ پنجاب میں آندھی اور جھکڑ کے باعث کھڑی فصلوں اور کمزورسٹرکچر کو شدید نقصان کا خطرہ ہے، کسان حضرات موسمیاتی پیشگوئی کو مد نظر رکھتے ہوئے اپنے معاملات ترتیب دیں۔
ڈی جی پی ڈی ایم اے عمران قریشی نے کہا ہے کہ تمام اضلاع بروقت انتظامات مکمل کریں اور ہنگامی صورتحال سے نمٹنے کے لیے تیار رہیں۔ متعلقہ اضلاع عملے کی شفٹ وائز 24 گھنٹے ڈیوٹیاں تفویض کی جائیں۔
