آئیووا : امریکہ میں سات ماہ کے بیٹے پر تشدد کرنے والے سفاک باپ نے پولیس کے سامنے اعتراف جرم کرلیا، ملزم کا کہنا تھا کہ میں نے غصے کی حالت میں بچے کو تھپڑ مارا۔
تفصیلات کے مطابق امریکہ کی ریاست آئیوا کی ویسٹ ڈیس موئنز پولیس نے ایک ایسے شخص کو گرفتار کیا ہے جس نے اپنے سات ماہ کے بچے کو زرودار تھپڑ مار کر اس کی ہڈی توڑ دی تھی۔
انیس سالہ ملزم سیزر کورونا لوپیز کے جرم کو اے کلاس قرار دیا گیا ہے، ملزم کے اعتراف جرم کے بعد اسے پولک کاؤنٹی جیل میں بند کردیا گیا ہے۔
ویسٹ ڈیس موئنس پولیس کے مطابق مقامی اسپتال سے انہیں اطلاع موصول ہوئی کہ ایک سات سالہ بچے پر تشدد کر کے اسے شدید زخمی کیا گیا ہے۔
پولیس نے موقع پر پہنچ کر معاملے کا جائزہ لیا، ڈاکٹروں نے پولیس کو بتایا کہ7 ماہ کے بچے کے دائیں کان کے پیچھے کی جانب کھوپڑی میں فریکچر ہوا ہے۔
عدالتی بیان میں تفتیشی افسر کا کہنا ہے کہ یہ واقعہ ویسٹ ڈیس موئنز کے 11 ویں اسٹریٹ کے 1100 بلاک میں واقع اپارٹمنٹ میں پیش آیا، کورونا لوپیز نے اپنے سات ماہ کے بچے کو جھولے کے اندر پھینکنے اور اسے زور دار تھپڑ مارنے کا اعتراف کیا ہے کہ جس سے اس کے کان کے پاس کھوپڑی کی ہڈی ٹوٹ گئی۔
