لندن:انگلینڈ کے سابق فٹبالر ڈیوڈ بیکھم پر گاڑی چلاتے ہوئے موبائل فون استعمال کرنے کے جرم مین 6 ماہ تک ڈرائیونگ پر پابندی عائد کردی گئی۔ جرم کا ارتکاب کرتے ہوئے ان کی تصویر ایک شہری نے لی تھی۔
تفصیلات کے مطابق 44 سالہ سابق کھلاڑی نے 21 نومبر کو لندن میں عوام کی جانب سے نشاندہی کرنے پر اپنی غلطی کا اعتراف کیا۔جنوبی لندن کے بروم لے مجسٹریٹ کورٹ نے فٹبالر کے لائسنس پر 6ماہ کی پینالٹی پوائنٹس عائد کیے اور 750پانڈ جرمانہ عائد کرتے ہوئے 100پاؤنڈ استغاثہ کی فیس اور 75پاؤنڈ سرچارج فیس ادا کرنے کا بھی حکم دیا۔
ضلعی جج کیتھرین مور کا کہنا تھا کہ ڈیوڈ بیکھم کے لائسنس میں اس سے قبل تیز رفتاری کے باعث 6پوائنٹس لگے ہوئے تھے ،جس کے بعد اب لگنے والے پوائنٹس کے بعد وہ 12 پوائنٹ کی حد پار کرچکے ہیں جس سے انہیں پابندی کا سامنا کرنا پڑا۔
عدالت میں انہوں نے اپنا پورا نام، تاریخ پیدائش اور پتہ بتایا۔استغاثہ کے وکیل میتھیو اسپریٹ کا کہنا تھا کہ عوام میں سے ایک شخص نے ڈیوڈ بیکھم کی ٹریفک میں گاڑی چلاتے ہوئے موبائل فون پر بات کرتے ہوئے تصویر کھینچی تھی۔
دفاعی وکیل جرارڈ ٹائیرل کا کہنا تھا کہ ڈیوڈ بیکھم گاڑی آہستہ چلارہے تھے اور اس واقعے کے بارے میں انہیں کچھ خاص یاد نہیں ہے۔ان کا کہنا تھا کہ جو ہوا ،اسے چھپایا نہیں جاسکتا لیکن ان کی نظر میں انہیں کچھ یاد نہیں، انہوں نے اعتراف جرم کرنا تھا اور انہوں نے وہی کیا۔
