یاقوت الحموی ایک مسلمان جغرافیہ دان تھے جنھوں نے متعدد علمی و سائنسی موضوعات پر کتب تصنیف کیں جن میں مشہور ترین کتاب معجمُ البلدان ہے جس کا کئی زبانوں میں ترجمہ بھی کیا گیا۔ ان کا سنِ وفات 20 اگست 1229ء ہے۔
تاریخ کے اوراق میں اس مسلمان عالم کے ولادت اور خاندانی حالات کا تذکرہ نہیں ملتا، لیکن ان کا اصل اور مکمل نام “الشیخ الامام شہابُ الدّین ابو عبد اللہ یاقوت بن عبد اللہ الحموی الرومی البغدادی” بتایا جاتا ہے اور کہا جاتا ہے کہ وہ ایک غلام تھے جنھیں روم سے قیدی بنا کر بغداد لایا گیا تھا۔ یہاں انھیں ایک تاجر “عسکر الحموی” نے خریدا تھا اور اسی نسبت وہ یاقوتُ الحموی کہلائے۔
یاقوت الحموی کو جغرافیہ اور حساب کتاب سے خصوصی شغف تھا۔ انھوں نے جغرافیہ کے عنوان پر ایک معجم ترتیب دی جس کے مقدمے میں دیگر فنون کے علاوہ فنِ جغرافیہ پر خصوصی گفتگو کی۔ انھوں نے صرف و نحو اور لغت کے دوسرے قاعدے سیکھے اور تجارت کی غرض سے دور دراز کا سفر کیا، جس کے بعد انھیں مالک نے آزاد کردیا تھا۔ اپنے اسفار اور مختلف مقامات پر قیام کے دوران انھوں نے جغرافیائی معلومات اکٹھی کیں اور کتابی شکل میں انھیں محفوظ کیا۔
ان کی اہم اور مشہور ترین کتاب معجم البلدان میں دیگر موضوعات کے ساتھ ساتھ زمین کے بارے میں تصورات کو زیرِ بحث لایا گیا ہے۔
