کراچی کے چڑیا گھر میں گزشتہ کئی ماہ سے بیمار ہتھنی نور جہاں کی ہلاکت پر ایڈووکیٹ ہائیکورٹ کی جانب سے مقدمہ درج کرانے کا فیصلہ کیا گیا ہے۔ اس سلسلے میں عمران نذیر نامی وکیل گارڈن تھانے پہنچ گئے۔
گارڈن تھانے میں ایڈمنسٹریٹر کے ایم سی اور ڈائریکٹر کراچی زو کے خلاف درخواست وصول کرلی گئی ہے۔
درخواست گزار کا مؤقف ہے کہ بیمار ہتھنی کی ہلاکت کا واقعہ ان دو افسران کی لاپرواہی اور غفلت کے باعث پیش آیا، چڑیا گھر میں ہتھنی و دیگر جانوروں کی ہلاکت کا مقدمہ درج کیا جائے۔
درخواست میں مزید کہا گیا ہے کہ ہتھنی نورجہاں و دیگر جانوروں کی ہلاکت کی تحقیقات کرائی جائیں، واقعے کے ذمہ داران کے خلاف قانونی کارروائی کراؤں گا۔
علاوہ ازیں ایڈمنسٹریٹر کراچی ڈاکٹر سیف الرحمان نے میڈیا سے گفتگو کرتے ہوئے کہا کہ ہتھنی نورجہاں کےانتقال سے ہم سب اُداس ہیں،اس کی لاش کے پوسٹ مارٹم کے بعد رپورٹ بھی شیئر کی جائے گی۔
ایڈمنسٹریٹرکراچی کا کہنا تھا کہ چڑیا گھر میں جانوروں کو کھانا نہ دینے کی خبریں سراسر غلط بیانی پر مبنی ہیں، ان دنوں میں لاکھوں لوگ کراچی چڑیا گھر آتے ہیں۔
