کراچی : سیکریٹری آل کراچی ریسٹورنٹ ایسوی ایشن نے ریسٹورنٹ رات 10 بجے بند کرنے کا فیصلہ مسترد کردیا اور کہا حکومت فیصلے پرنظر ثانی کرے۔
تفصیلات کے مطابق سیکریٹری آل کراچی ریسٹورنٹ ایسوی ایشن فیضان راوت نے اپنے بیان میں کہا ہے کہ ریسٹورنٹ رات 10 بجے بند کرنے کا حکومتی فیصلہ مسترد کرتے ہیں۔
فیضان راوت کا کہنا تھا کہ مشکل وقت میں حکومت کے ساتھ اپنا کردار ادا کرنے کیلئے تیارہیں، 10بجے ریسٹورنٹ بند کرناناممکن ہے،حکومت فیصلے پرنظر ثانی کرے۔
سیکریٹری آل کراچی ریسٹورنٹ نے کہا کہ ہم ریسٹورنٹ12بجے تک کھولنے کی اجازت مانگ رہے ہیں، حکومت نے نظرثانی نہیں کی تو احتجاج کا حق رکھتے ہیں۔
یاد رہے سندھ حکومت کی جانب سے توانائی بچت پروگرام کے تحت کراچی میں شاپنگ مالز اور مارکیٹیں رات ساڑھے آٹھ بجے، شادی ہال اور ریسٹورنٹس رات دس بجے بند کرنے کے احکامات جاری کئے گئے ہیں۔
