واشنگٹن: امریکی صدر سے نائن الیون کی خفیہ دستاویزات سامنے لانے کا مطالبہ کیا جا رہا ہے۔
تفصیلات کے مطابق 11 ستمبر کے ہلاک شدگان کے اہلِ خانہ نے خفیہ دستاویزات منظر عام پر لانے کا مطالبہ کر دیا ہے، ان کا امریکی صدر سے کہنا ہے کہ جو بائیڈن ان حملوں سے متعلق حکومت کی جمع کردہ خفیہ دستاویزات اور ثبوت کو منظر عام پر لائیں۔
اس سلسلے میں صدر بائیڈن کو ایک خط بھیجا گیا ہے، جس میں نائن الیون سانحے کے ہلاک شدگان کے لواحقین نے کہا کہ اگر صدر بائیڈن نے ایسا نہ کیا تو انھیں رواں سال کی یادگاری تقریبات میں خوش آمدید نہیں کہا جائے گا۔
لواحقین کا کہنا ہے کہ 20 برس قبل ہونے والے دہشت گرد حملوں میں سعودی عرب کی حکومت کے عہدے دار اور ساتھی ملوث ہو سکتے ہیں، کیوں کہ ان حملوں کے منصوبہ ساز اسامہ بن لادن اور بیش تر حملہ آوروں کا تعلق سعودی عرب سے تھا۔
خیال رہے کہ سابق امریکی حکومتوں نے قومی سلامتی خدشات کا دعویٰ کرتے ہوئے تحقیقات کی دستاویزات اور ثبوت ظاہر نہیں کیے تھے، جب کہ بائیڈن نے گزشتہ موسم خزاں میں اپنی انتخابی مہم کے دوران دستاویزات کو منظر عام پر لانے کا عندیہ دیا تھا۔
امریکی میڈیا کے مطابق صدر بائیڈن کو جمعہ کے روز بھیجے گئے خط پر خاندانوں کے تقریباً 1800 ارکان اور دیگر نے دستخط کیے ہیں۔
