کراچی : ایم کیوایم اور پیپلزپارٹی کے درمیان اضافی یوسیز کے حوالے سے گزشتہ رات ہونے والے مذاکرات کے معاملے پر کوئی پیشرفت نہ ہوسکی۔
اس حوالے سے ذرائع کا کہنا ہے کہ آج 12فروری کو فوارہ چوک پر دیئے جانے والے دھرنے کو مؤخر کرنے کے باوجود سندھ حکومت کی جانب سے کوئی اقدام سامنے نہ آسکا۔
ذرائع کے مطابق ایم کیوایم کی جانب سے شہر کراچی میں53اضافی یوسی کے قیام کے نوٹی فکیشن کے مطالبے میں تاخیر ہورہی ہے جبکہ ایم کیوایم کو پیپلزپارٹی کی جانب سے یقین دہانی بھی کرائی گئی تھی۔
اس سلسلے میں متحدہ قومی موومنٹ پاکستان نے پیپلز پارٹی پر الزام عائد کیا ہے کہ ماضی کی طرح پھر مسلسل تاخیر کی جارہی ہے۔
ذرائع کا کہنا ہےکہ گورنر سندھ کامران ٹیسوری اور وزیراعلیٰ سندھ مراد علی شاہ آپس میں رابطے میں ہیں، دونوں شخصیات معاملہ کو خوش اسلوبی سے طے کرانے کے لئے متحرک ہیں۔
دوسری جانب متحدہ ذرائع کہتے ہیں کہ کراچی اور حیدرآباد کے حوالے سے نوٹیفکیشن جاری نہ ہوا تو دھرنا ہی ہمارا آخری آپشن ہے اور یہ دھرنا غیرمعینہ مدت کے لئے دیا جائے گا۔
ایم کیو ایم ذرائع کے مطابق دھرنے کے علاوہ اور بھی آپشنز ہیں جو استعمال کیے جاسکتے ہیں، ہماری اولین ترجیح پاکستان ہے اس لئے احتیاط کا مظاہرہ کررہے ہیں۔
متحدہ ذرائع کا کہنا ہے کہ ہم نے پاکستان کی بہتری کے لئے ہی دھرنا مؤخر کیا تھا لیکن اب 14فروری کے بعد اپنا آئندہ کا لائحہ عمل دیں گے۔
