موسم سرما کی کچھ غذائیں ایسی ہوتی ہیں جن کا استعمال سردی کی شدت کو کم کرنے کے لیے کار آمد ہوتا ہے، ایسی غذاؤں کے استعمال سے سردیوں میں ہونے والی بیماریوں سے بچا جاسکتا ہے۔
غذائی ماہرین کے مطابق سردیوں میں جہاں بہت سی مزے دار رنگ برنگی موسمی سبزیوں اور پھلوں کا استعمال بڑھ جاتا ہے وہیں یہ موسم گنے کے رس سے بنے گُڑ کھانے کا بھی ہوتا ہے۔
اے آر وائی نیوز کے پروگرام باخبر سویرا میں ہربلسٹ غالب آغا نے گڑ کے بیش بہا فوائد سے متعلق ناظرین کو آگاہ کیا اور اسے کھانے کا طریقہ بیان کیا۔
انہوں نے بتایا کہ گڑ کا موازنہ چینی سے کیا جائے تو گڑ ہر حال میں بہتر ہے کیونکہ چینی میں صرف کیلوریز ہیں آئرن، پوٹاشیم میگنیشم نہیں ہیں جبکہ گڑ میں یہ تمام اجزاء اور کیلوریز پائی جاتی ہیں۔
ایک سوال کے جواب میں ہربلسٹ غالب آغا نے بتایا کہ یہ بات ٹھیک ہے کہ گڑ چینی سےبہت بہتر ہے لیکن ہمارے معاشرے میں یہ غلط فہمی عام ہے کہ شوگر کے مریض گڑ کھا سکتے ہیں، ایسا بالکل نہیں ہے ذیابیطس کے مریض ’گُڑ‘ بھی نہیں کھا سکتے۔
انہوں نے بتایا کہ شکر (براؤن شوگر) بھی سفید چینی کی طرح کی ہی چیز ہے اس کو صرف زیادہ ریفائن کیا جاتا ہے اس کا بھی وہی نقصان ہے جو چینی کا ہے۔
ان کا کہنا تھا کہ عام انسان کو روزانہ10سے 20گرام گڑ استعمال کرنا چاہیے۔ جو چائے کافی یا کسی اور پکوان میں شامل کرکے کھایا جاسکتا ہے۔
گڑ تاثیر میں گرم اور افادیت میں بہترین غذا کے طور پر سمجھا جاتا ہے، گڑ کے ساتھ اگر کالے چنے ملا کر کھائے جائیں تو مجموعی صحت پر ان کے بے شمار فوائد بڑھ جاتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔
