The news is by your side.

Advertisement

دلیپ کمار کا ہم شکل مشہور پاکستانی ہیرو کون تھا؟

اداکار حنیف کا نام شاید آپ میں‌ سے بہت سے قارئین کے لیے نیا ہو اور سنیما کے ان شائقین کے لیے جو اب خاصے سن رسیدہ ہیں، ایک بھولی بسری یاد۔

کیا آپ جانتے ہیں‌ کہ پاکستان کی فلم انڈسٹری کا یہ اداکار شہنشاہِ‌ جذبات دلیپ کمار سے خاصی مشابہت رکھتا تھا؟ انھیں اکثر لوگ دلیپ کمار کہہ کر مخاطب کرتے تھے۔

اداکار حنیف نے فلموں‌ سے ہیرو کے طور پر اپنے کیریئر کا آغاز کیا اور بعد میں‌ ولن کی حیثیت سے خوب شہرت پائی۔ وہ خُوب رو اور پرکشش شخصیت کے مالک تھے۔ کہتے ہیں‌ کہ دلیپ کمار سے مشابہت ہی اسے فلمی دنیا کی طرف لے گئی تھی۔

حنیف موٹر مکینک تھے۔ اس زمانے میں‌ ایک فلم ساز کو ’’ہمیں بھی جینے دو‘‘ کے لیے ہیرو کی تلاش تھی اور حنیف کی خوش قسمتی تھی کہ وہ فلم ساز کی نظر میں‌ آگئے۔ یوں وہ 1963ء میں‌ نمائش کے لیے پیش کی گئی اس فلم کے ذریعے بڑے پردے پر نظر آئے۔ اگلے ہی برس بھارت سے آئے ہوئے فلم ساز اور ہدایت کار نے انھیں اپنی فلم ’’میخانہ‘‘ کا کردار نبھانے کو دے دیا اور حنیف نے اس میں‌ بگڑے ہوئے نواب زادے کا کردار نبھا کر خوب ستائش اور داد سمیٹی۔ بعد کے برسوں‌ میں‌ کئی کام یاب اور سپر ہٹ فلمیں حنیف کے کیریئر کا حصّہ بنیں۔

فلم ’’ہم دونوں‘‘ میں پہلی بار حنیف نے ولن کا کردار نبھایا اور اس کے بعد انھیں زیادہ تر وِلن کے کردار آفر ہونے لگے۔ اس اداکار نے ہر کردار کو نہایت خوبی سے نبھایا اور خود کو باکمال فن کار ثابت کیا۔

دلیپ کمار سے مشابہت رکھنے والے پاکستانی اداکار حنیف نے اپنے وقت کے تمام بڑے اداکاروں اور اپنے وقت کی مشہور اور مقبول ترین ہیروئنوں کے ساتھ کام کیا۔

اداکار حنیف 2 جولائی 1990ء کو کراچی میں انتقال کرگئے تھے اور اتفاق ہے کہ دلیپ کمار کا بھی ماہِ وفات یہی ہے۔

Comments

یہ بھی پڑھیں