بھارت کی ریاست مدھیہ پردیش میں ڈاکٹروں نے کامیاب سرجری کرتے ہوئے خاتون کے جسم سے 15 کلو وزنی رسولی (ٹیومر) نکال لی۔
غیر ملکی میڈیا کی رپورٹس کے مطابق اشٹا سے تعلق رکھنے والی 41 سالہ مریضہ نے انڈیکس اسپتال کے ڈاکٹروں سے پیٹ میں درد کی شکایت کی تھی۔
جب خاتون کا معائنہ کیا گیا تو ان کے جسم میں 15 کلو وزنی رسول پائی گئی۔ ایک درجن سے زائد ڈاکٹروں پر مشتمل ٹیم نے کم از کم دو گھنٹے طویل کامیاب سرجری کے بعد ٹیومر نکال لیا۔
ٹیم میں شامل ڈاکٹر اتل ویاس نے بتایا کہ مریضہ کے جسم میں ٹیومر بہت بڑا تھا جس کی وجہ سے ان کو چلنے پھرنے میں بھی تکلیف ہو رہی تھی، ہم نے تمام باتوں کا جائزہ لینے کے بعد آپریشن کا فیصلہ کیا۔
اتل ویاس نے بتایا کہ ٹیم کو سرجری کے دوران انتہائی محتاط رہنا پڑا کیونکہ کوئی بھی غلطی خاتون کی جان لے سکتی تھی۔
ڈاکٹروں کے مطابق خاتون کا اپنا وزن 49 کلو جبکہ رسولی کا وزن 15 کلو تھا جس کی وجہ سے ان کے پیٹ میں سوجن بھی ہوئی، اگر بروقت آپریشن نہ کیا جاتا تو یہ اندر ہی پھٹ سکتا تھا۔
مریضہ کی طبیعت اب خطرے سے باہر بتائی جاتی ہے۔