سماجی رابطے کی ویب سائٹ ٹوئٹر پر پانچ روز قبل کی جانے والی تبدیلی کو اصل شکل میں بحال کردیا گیا، ٹوئٹر کا آئیکونک بلیو برڈ لوگو واپس لگا دیا گیا۔
آج سے پانچ روز قبل3 اپریل کو ٹوئٹر کے مالک ایلون مسک کی جانب سے کمپنی کے لوگو بلیو برڈ کو کرپٹو کرنسی ڈوج کوائن کے لوگو سے تبدیل کردیا تھا۔
ٹوئٹر کے مالک ایلون مسک طویل عرصے سے اس کرپٹو کرنسی ڈوگی کوائن کے حامی ہیں جو 2013 میں ایک مذاق کے طور پر تیار کی گئی تھی۔
ٹوئٹر کے لوگو پر اس کرنسی کے لوگو کے استعمال سے کرپٹو کرنسی کی قدر میں اضافہ ہوا تھا۔ اب ٹوئٹر کی جانب سے بلیو برڈ لوگو کو واپس لانے سے ڈوگی کوائن کی قدر میں 9 فیصد کمی دیکھنے میں آئی ہے۔
بلیو برڈ لوگو تبدیل کرکے دوبارہ بحال کرنے سے متعلق ایلون مسک اور ٹوئٹر کی جانب سے اب تک وضاحتی بیان سامنے نہیں آیا۔
واضح رہے کہ ایلون مسک کے خلاف ڈوگی کوائن کی حمایت پر جون 2022 میں 258 ارب ڈالرز ہرجانے کا دعویٰ بھی دائر کیا گیا تھا۔ ایلون مسک نے امریکی عدالت میں درخواست دی تھی کہ ڈوج کوائن کے سرمایہ کاروں کی جانب سے دائر کیے گئے مقدمے کو خارج کیا جائے۔
