لاہور کے علاقے ملت پارک میں 9 سالہ گھریلو ملازمہ پراسرار طور پر جھلس کر جاں بحق ہوگئی۔
اے آر وائی نیوز کے مطابق لاہور کے علاقے ملت پارک میں 9 سالہ زینب سلمان نامی شخص کے گھر چند ماہ سے ملازمت کررہی تھی، بچی کو زخمی حالت میں آج اسپتال منتقل کیا گیا جہاں وہ جانبر نہ ہوسکی۔
پولیس کا کہنا ہے کہ گھر کے مالک سلمان کو گرفتار کرلیا گیا ہے۔
ملزم نے پولیس کو دیے گئے بیان میں بتایا کہ گھریلو ملازمہ گزشتہ روز کچن میں سلنڈر پھٹنے سے جھلسی تھی جسے ابتدائی طبی امداد گھر میں ہی دی جاتی رہی، حالت زیادہ بگڑنے پر آج اسپتال منتقل کیا گیا تھا۔
پولیس کو بتانا ہے کہ ملزم نے زینب کے گھر والوں کو جھلسنے کی اطلاع نہیں دی تھی۔
ڈی آئی جی آپریشنز نے قصور میں زینب کے ورثا سے رابطہ کیا ہے جبکہ ورثا کی درخواست پر تھانہ ملت پارک میں مقدمہ بھی درج کرلیا گیا ہے۔
ایس پی اقبال ٹاؤن کا کہنا ہے کہ موت کے اصل حقائق پوسٹ مارٹم رپورٹ کے بعد سامنے آئیں گے۔
ڈی آئی جی آپریشنز فیصل کامران نے ورثا سے ملاقات کی اور بچی کے ورثا کو انصاف فراہم کرنے کی یقین دہانی کروائی۔
