واشنگٹن : امریکی صدر کے وکلاء نے کہا ہے کہ ڈونلڈ ٹرمپ کیخلاف مواخذے کی کارروائی عوام پر خطرناک حملہ اور آئندہ ہونے والے صدارتی الیکشن کو متاثر کرنے کی شرمناک حرکت ہے۔
تفصیلات کے مطابق امریکی صدر ڈونلڈ ٹرمپ کے وکلاء نے مواخذے کو عوام پر خطرناک حملہ قرار دے دیا، اس حوالے سے وکلا نے6 صفحات پر مشتمل خط لکھا ہے جس میں کہا گیا ہے کہ ڈونلڈ ٹرمپ کیخلاف ڈیمو کریٹس الزامات ثابت نہیں کرسکتے۔
وکلاء کا کہنا ہے کہ ڈونلڈ ٹرمپ کیخلاف مواخذے کی کارروائی عوام کے حقوق پر خطرناک حملہ اور آئندہ صدارتی الیکشن کو متاثر کرنے کی شرمناک حرکت ہے۔
واضح رہے کہ سینیٹ میں امریکی صدر ڈونلڈ ٹرمپ کے مواخذے کی کارروائی کا آغاز21 جنوری سے ہوگا، ٹرمپ کے دفاعی ٹیم میں کلنٹن سے مواخذے میں تفتیش کرنے والے وکلاء شامل ہیں، امریکی ایوان نمائندگان مواخذے کی پہلے ہی منظوری دے چکا ہے۔
اس سسلے میں امریکی ایوان نمائندگان میں تین روز قبل صدر ٹرمپ کے مواخذے کے آرٹیکلز سینیٹ کو بھجوانے کی قرارداد کو کثرت رائے سے منظور کرلیا گیا ہے۔
اسپیکر ایوان نمائندگان نینسی پلوسی نے صدارتی مواخذے کی قرارداد پر دستخط کر دیے، امریکی ایوان نمائندگان میں قرارداد کے حق میں 228جب کہ مخالفت میں193 ووٹ کاسٹ ہوئے۔
نینسی پلوسی نے ٹرمپ کے مواخذے کی قرارداد پر دستخط کر دیے
یاد رہے کہ صدر ٹرمپ کے مواخذے کی قرارداد گزشتہ ماہ ایوان نمائندگان میں منظور کی گئی تھی، ان پر اختیارات سے تجاوز اور کانگریس کو روکنے کے الزامات عائد کیے گئے ہیں۔
اسپیکر نینسی پلوسی کا کہنا تھا کہ کوئی قانون سے بالا تر نہیں ہے، صدرڈونلڈ ٹرمپ بھی اپنی قوم کے سامنے جواب دہ ہیں۔
