واشنگٹن : نومنتخب امریکی صدر ڈونلڈ ٹرمپ نے الزام عائد کیا ہے کہ اوباما انتظامیہ نے داعش کو تخلیق کیا ہے، ڈونلڈ ٹرمپ نے بزفیڈ اور سی این این کو مخاطب کرتے ہوئے کہا کہ تم لوگ جھوٹی خبریں دیتے ہو، روسی ہیکنگ کی کہانیاں جھوٹی ہیں جو کچھ لوگوں نے مل کر بنائی ہیں۔
ان خیالات کا اظہار واشنگٹن میں انتخابات جیتنے کے بعد نومنتخب امریکی صدر ڈونلڈ ٹرمپ نے اپنی پہلی پریس کانفرنس میں صحافیوں سے گفتگو کرتے ہوئے کیا۔ ڈونلڈ ٹرمپ نے کہا کہ روسی ہیکنگ سے متعلق انٹیلی جنس بریفنگ کے حوالے سے نہیں بتا سکتا، تاہم روسی ہیکنگ کی معلومات افشا ہونا شرمناک ہے۔
روس ہیکنگ کرتا تو اس کا ضرور اعتراف کرتا، انہوں نے کہا کہ روس ہمیں داعش کے ساتھ لڑنے میں مدد کرسکتا ہے، روسی صدر کا مجھے بطور صدر پسند کرنا امریکہ کے مفاد میں ہے، روس سےمیری کوئی ڈیل نہیں ہوئی۔
ایک سوال کے جواب میں ان کا کہنا تھا کہ صدر بننے کے بعد کاروبارنہیں کرنا چاہتا، ٹیکس ریٹرن نہیں بتاؤں گا، میرے ٹیکس ریٹرنز کی فکرصرف میڈیا کو ہوتی ہے۔
انہوں نے کہا کہ میرا کاروبار اب میرے دو بیٹے سنبھالیں گے، ڈونلڈ ٹرمپ نے پریس کانفرنس کے دوران اپنے مخالف میڈیا گروپس پرشدید تنقید کرتے ہوئے انہیں نتائج بھگتنے کی دھمکی بھی دی۔
ڈونلڈ ٹرمپ نے بزفیڈ اور سی این این کو مخاطب کرتے ہوئے کہا کہ تم لوگ جھوٹی خبریں دیتے ہو، ڈونلڈ ٹرمپ نے امریکی نیوز چینل سی این این کے رپورٹر کے سوال کا جواب دینے سےانکار کیا اور کہا کہ میں آپ کےسوال کا جواب نہیں دوں گا۔
