اسلام آباد: وزیر اعظم کے معاون خصوصی برائے صحت ڈاکٹر ظفر مرزا کا کہنا ہے کہ کورونا وائرس سے متعلق حکمت عملی مرتب کرلی گئی ہے، کورونا کے مشتبہ 7 لوگوں کے نمونے نیگٹیو آنا خوش آئند ہے۔
تفصیلات کے مطابق وزیر اعظم عمران خان کے معاون خصوصی برائے صحت ڈاکٹر ظفر مرزا اور پاکستان میں چینی سفیر یاؤ ژنگ نے نیوز کانفرنس کی۔
نیوز کانفرنس میں ڈاکٹر ظفر مرزا کا کہنا تھا کہ کورونا وائرس سے متعلق حکمت عملی مرتب کرلی گئی ہے، ایئرپورٹ پر آنے والے مسافروں سے متعلق ایس او پیز جاری کردیے۔
ڈاکٹر ظفر مرزا کے مطابق وزارت صحت کی ٹیمیں تمام ایئرپورٹس پر جائیں گی، وزارت صحت کی ٹیمیں صوبائی عملے کے ساتھ مل کر کام کریں گی، کورونا وائرس کی تشخیص کی کٹس پاکستان میں آچکی ہیں۔ کورونا وائرس کے مشتبہ 7 لوگوں کے نمونے نیگٹیو آنا خوش آئند ہے۔
انہوں نے کہا کہ چین سے پاکستانیوں کی واپسی کا سلسلہ شروع ہوگیا ہے، چین سے آنے والے مسافروں کا خود استقبال کیا اور انتظامات کا جائزہ لیا۔ چین سے آنے والا کوئی مسافر ایسا نہیں جسے آبزرویشن کی ضرورت ہو، ایئرپورٹ پر جو سسٹم لگائے ہوئے تھے ان کا خود جائزہ لیا۔
ڈاکٹر ظفر مرزا کا کہنا تھا کہ چین سے کوئی بھی پاکستانی یا چینی 14 دن اسکریننگ سے گزر کر آتے ہیں۔ ہم اپنے نظام اور پورٹ آف انٹریز کو مزید بہتر کریں گے۔
انہوں نے کہا کہ کورونا وائرس کا تاحال کوئی علاج دریافت نہیں ہو سکا، حکومت وائرس کا پھیلاؤ روکنے کے بھرپور اقدامات کر رہی ہے، مشتبہ مریضوں کو زیر علاج رکھنے کا مقصد مانیٹرنگ کرنا ہے۔ قوت مدافعت بڑھنے پر کورونا وائرس کا مریض صحت یاب ہونے لگتا ہے۔
چینی سفیر یاؤ ژنگ کا کہنا تھا کہ کورونا وائرس سے چین میں 371 افراد ہلاک ہو چکے ہیں، چین میں صورتحال کافی سنگین ہے، پر امید ہیں وبا سے نمٹ لیں گے۔ پاکستان کی حمایت کو سراہتے ہیں۔ وزیر اعظم عمران خان نے چینی صدر کو خط بھی لکھا۔
انہوں نے کہا کہ چیلنج سے نمٹنے کی کوشش کر رہے ہیں، مشکلات وقتی ہیں۔ ملک میں تمام تقریبات کو منسوخ کر دیا ہے۔ ڈبلیو ایچ او نے ہمارے اقدامات کو سراہا ہے۔
چینی سفیر کا کہنا تھا کہ چین میں پاکستانیوں کی کثیر تعداد ہے، تمام پاکستانیوں کے ساتھ رابطے میں ہیں۔ چین میں پاکستانی شہریوں کو اپنا ہم وطن سمجھتے ہیں۔ سفر کے لیے 2 ہفتے معائنے میں رکھا جاتا ہے۔ 8 شہروں میں پاکستانی طلبا موجود ہیں۔ 100 سے زائد ممالک کے شہری ابھی تک چین میں ہیں۔
انہوں نے کہا کہ وبا کا آغاز اسپرنگ فیسٹول کے دوران ہوا، 21 جنوری سے چینی حکومت نے سخت اقدامات کرنا شروع کر دیے۔ ہم ہر حکمت عملی کا بغور جائزہ لے رہے ہیں۔ تمام ممکنہ اقدامات کیے جا رہے ہیں تاکہ علاج نکالا جا سکے۔
چینی سفیر کا کہنا تھا کہ 12 چینی شہریوں سمیت 130 شہری آج صبح چین سے پاکستان پہنچے ہیں، 12 چینی شہریوں کا تعلق کورونا سے متاثرہ صوبوں سے نہیں۔
