لاہور: پاکستان سپر لیگ سیزن سیون کیلئے پلئیرز ڈرافٹنگ آج نیشنل ہائی پرفارمنس سینٹر لاہور میں ہوگی، کراچی کنگز نےآٹھ کھلاڑیوں کو برقرار رکھاہے۔
تفصیلات کے مطابق پی ایس ایل سیون سیزن کے لئے پلئیرز ڈرافٹنگ آج ہوگی،کرکٹرز کی ٹریڈنگ، ٹرانسفر اور برقرار رکھنے کی ونڈوز گذشتہ روز بند ہوگئیں تھیں۔
ہر فرنچائز کو آخری ایونٹ کے زیادہ سے زیادہ 8 کھلاڑیوں کو برقرار رکھنے کی اجازت تھی، آج ہونے والی ڈرافٹنگ میں بتیس ممالک کےچار سو پچیس کھلاڑی رجسٹرڈ ہوئے۔
سال دو ہزار بیس کی چیمپئن کراچی کنگز نے آٹھ کھلاڑیوں کو برقرار رکھا، دنیا کےنمبر ون بیٹسمین بابراعظم سپہ سالارہوں گے، ڈائمنڈکیٹگری میں محمدنبی اور محمدعامر کو برقرار رکھا گیا ہے، انگلینڈ کےجوکلارک گولڈ کیٹگری اوربرانڈ ایمبسیڈربھی ہوں گے،جارح مزاج بلے باز شرجیل خان، عامریامین گولڈ اور محمدالیاس سلور کیٹگری میں شامل ہے۔
یہ بھی پڑھیں: ویسٹ انڈیز کے تین کھلاڑیوں کا کورونا ٹیسٹ مثبت آگیا
جیسن روئے،کولن منرو، ڈیوڈملر، کارلوس بریتھویٹ سمیت بھی یونیورس باس کرس گیل پلاٹینم کیٹگری میں شامل ہیں، ڈرافٹنگ کے لئے پی سی بی نے رائٹ ٹومیچ کارڈ متعارف کرایا ہے،جس کی مدد سے فرنچائز اپنے ریلیز کیےکھلاڑیوں میں سے ایک کو پک کرسکےگی۔
ڈرافٹنگ میں پہلی پک لاہور قلندرز کی ہوگی کراچی کنگز کی تیسری باری ہے، ہر فرنچائز کو اٹھارہ کا اسکواڈ مکمل کرناہوگا۔
واضح رہے کہ پی ایس ایل سیزن سیون کا آغاز ستائیس جنوری سے ہوگا، افتتاحی میچ دفاعی چیمپئن ملتان سلطانز اور کراچی کنگز کےدرمیان نیشنل اسٹیڈیم میں کھیلا جائےگا۔
