دبئی: متحدہ عرب امارات میں پولیس نے کامیاب کارروائی کرتے ہوئے 365 کلو گرام منشیات پکڑلی اور 16 ملزمان کو گرفتار کرلیا گیا۔
عرب میڈیا کے مطابق دبئی پولیس نے 280 ملین درہم مالیت کی منشیات گاڑیوں کے اسپیئر پارٹس میں چھپا کر اسمگل کرنے کی کوشش ناکام بنادی، منشیات اسمگلنگ میں ملوث 16 ملزمان کو گرفتار کرلیا گیا جن کا تعلق ایشیائی ملک سے بتایا گیا ہے۔
رپورٹ کے مطابق پکڑی جانے والی منشیات کی کھیپ میں 268 کلو گرام ہیروئن، 96 کلو گرام کرسٹل اور ایک کلو گرام چرس شامل ہے۔
ایشیائی ملک سے تعلق رکھنے والے ملزمان کی گرفتاری عجمان، شارجہ اور ام القوین پولیس کی مدد سے عمل میں آئی۔
میجر جنرل المری نے کہا کہ پولیس کو خفیہ ذرائع سے اطلاع ملی تھی کہ ایک بین الاقوامی گروہ امارات میں وسیع پیمانے پر منشیات پھیلا رہا ہے جس کے بعد اس گینگ کے کارندوں پر نظر رکھنا شروع کردی گئی تھی۔
مزید پڑھیں: متحدہ عرب امارات، 20 لاکھ درہم کی ڈکیتی میں ملوث 5 ملزمان گرفتار
انہوں نے کہا کہ ملزمان نے منشیات کی کھیپ شارجہ کے ایک گودام میں چھپا رکھی تھی۔
میجر جنرل المری کے مطابق گینگ کا سربراہ اپنے آبائی وطن میں موجود منشیات فروشوں کے ذریعے امارات میں منشیات منگواتا تھا جبکہ ان کے ساتھ مل کر کام کرنے والا ایک دوسرا گینگ بھی گرفتار کیا گیا۔
واضح رہے کہ متحدہ عرب امارات میں منشیات فروشی کے الزام میں پہلے بھی متعدد ملزمان گرفتار ہوچکے ہیں۔
