دبئی: متحدہ عرب امارات میں 2020 میں ایک بڑے تجارتی میلے کا انعقاد کیا جارہا ہے جس کے انفرا اسٹرکچر کے لیے تیاریاں شروع کردی گئی ہیں۔
عرب میڈیا کے مطابق نمائش سے متعلق جاری منصوبوں کو پایہ تکمیل تک پہنچانے کے لیے مالیت ساڑھے 42 ارب ڈالرز سے تجاوز کرچکی تھی، ان میں 17.4 ارب ڈالرز انفرا اسٹرکچر اور ٹرانسپورٹ کے منصوبوں، 13.2 ارب ڈالرز مکانات اور 11 ارب ڈالرز ہوٹلوں اور تھیم پارکس کی تعمیر پر صرف کیے جارہے ہیں۔
ان منصوبوں کے تحت دبئی کے آل مکتوم بین الاقوامی ایئرپورٹ پر کی تزئین و آرائش پر 8 ارب ڈالرز صرف کیے جارہے ہیں، یہ ایئرپورٹ شہر کے جنوب میں واقع ہے، اس کی توسیع سے شہر کے شمال میں واقع دبئی کے بین الاقوامی ہوائی اڈے پر فضائی ٹریفک کا بوجھ کم ہونے میں مدد ملے گی۔
رپورٹ کے مطابق 2017 میں دبئی ایئرپورٹ دنیا کا سب سے مصروف ترین ہوائی اڈا رہا تھا اور گزشتہ سال 8 کروڑ 80 لاکھ مسافروں نے سفر کیا تھا، کہا جارہا ہے کہ آل مکتوم اس توسیع منصوبے کی تکمیل کے بعد دنیا کا مصروف ترین ہوائی اڈا بن جائے گا۔
دبئی حکام کے مطابق نمائش سے معیشت مزید مستحکم ہوگی، رئیل اسٹیٹ ودیگر شعبوں کو مزید ترقی ملے گی جبکہ روزگار کے تین لاکھ نئے مواقع بھی پیدا ہوں گے۔
نمائش کا آغاز اکتوبر 2020 سے ہوگا اور یہ چھ ماہ تک جاری رہے گی، نمائش میں روزانہ تین لاکھ زائرین کی آمد متوقع ہے، ان میں نصف غیر ملکی ہوں گے۔
